İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 120 Hüküm no: 92 Orijinal metin no: [44-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Esnaf terekelerinin tahririnde ve emvâl-i eytâmın korunmasında görevli kâtip ve muhzırlar için sağlam kefiller istenmesi Me’mûr ta‘yîni A‘lemü’l-ulemâi’l-mütebahhırîn efdalü’l-fudalâi’l-müteverri‘în yenbû‘u’l-fazli ve’l-yakīn keşşâfü’l-müşkilâti’d-dîniye hallâlü’l-mu‘dılâti’l-yakīniye miftâhu künûzi’l-hakāyık messâhu’r-rumûzi’d-dekāyık el-mahfûfu bi-sunûf-i avâtıfi’l-meliki’l-a‘lâ bi’l-fi‘il şeyhülislâm ve müfti’l-enâm olup murassa‘ Osmânî nişân-ı hümâyûnumla ikinci rütbe Mecîdî nişân-ı zî-şânını hâiz ve hâmil olan Mevlânâ Ahmed Muhtâr Efendi -edâmallâhu te‘âlâ fezâilehû- tevkī‘-i refî‘-i hümâyûnum vâsıl olucak ma‘lûm ola ki esnâf-ı ma‘lûme terekelerinin tahrîri husûsunda müstahdem ketebenin tebeddül etmeleri cihetiyle yerlerinde istihdâm olunacakların dahi kefâlet-i mevsûka altına alınması ve emvâl-i eytâmın ale’d-devam emniyet-i tâm tahtında bulundurulması muktezî idiğine mebnî sıdk ve istikāmetleri mücerreb olan Kısmet-i Belediye ile Bâb Mahkemeleri Başkâtibi es-Seyyid Ahmed Bahâî ve mahkeme-i merkūme ketebesinden es-Seyyid Mehmed Tahir ve es-Seyyid Osman Nuri ve es-Seyyid Ali Rıza ve Hüseyin Sâbit ile mahkeme-i mezbûre muhzırlar kethudâsı Süleyman ve Muhzır el-Hâc Yusuf ve Ahmed nâmûn kimesnelerden herbiri hasbe’l-usûl müteselsilen kefâlet-i kaviyyeye rabt olunduklarından şurût ve kuyûd-ı lâzımenin derciyle bir kıt‘a emr-i şerîfim tasdîri Dârü’l-hilâfeti’l-aliyyem Kādılığı cânibinden verilen takrîr üzerine Meclis-i Tahkīkāt-ı Şer‘iyye’den bâ-müzekkere beyân olunduğundan icrâ-yı îcâbı tarafından inhâ ve iş‘âr olunmakdan nâşî keyfiyet Şûrâ-yı Devlet’e lede’l-havâle Dâhiliye Dâiresi’nde kırâet olundukda, ketebe-i mûmâ-ileyhim ile muhzırândan birinin hayat ve memâtında cüz’î ve küllî zimmeti ya‘ni eytâma deyni zuhûr ettikde evvel-emirde medyûn bulunan kimesnenin mâlik olduğu eşyâsı ve mülk menzil ve akārı bey‘ ü füruht olunup esmânından medyûnun zimmeti tesviye ve kifâyet etmediği hâlde sâirlerinden tahsîl ve itmâm olunduklarında vukū‘ bulan mu‘âmelâtının der-akab rü’yet-i muhâsebesiyle bir zimmeti tahakkuk etmediği hâlde berâet-i zimmeti’çün Emvâl-i Eytâm Müdüriyetiyle beledî kassâmlığı cânibinden bir kıt‘a muhâsebe defteri i‘tâ olunmak ve ber-mûceb-i nizâm-ı kadîm icrâ-yı mu‘âmelâta dikkat edilmek üzere mûmâ-ileyhimin nizâm-ı mer‘î üzere esnâf terekelerinin tahrîr ve tesviye-i müteferri‘âtına me’zûn edilmeleri husûsundan ibâret olup bu sûretin usûl ve emsâline tevâfuk eylediği Dîvân-ı hümâyûnum kaleminden ihrâc ettirilen evâmir-i şerîfe kayıdları mutâla‘asından anlaşılmış ve şurût-ı mezkûre-i esâsîyenin idâre-i matlûbe husûlüne kâfî ve kâfil idiği Meclis-i Tahkīkāt-ı Şer‘iyyece dahi musaddak bulunmuş idiğine binâen ol bâbda lâzım gelen emr-i şerîfimin tasdîri şûrâ-yı mezkûrdan bâ-mazbata ifâde olunmuş ve ol vechile icrâsı husûsuna emr ü irâde-i seniyye-i mülûkânem müte‘allik ve şeref-sudûr olmuş olmağın muktezâ-yı münîfi üzere Dîvân-ı hümâyûnumdan işbu emr-i celîlü’l-kadrim ısdâr ve i‘tâ olundu. Sen ki mevlânâ-yı müşârün-ileyhsin işbu emr-i âlîşânım sicill-i mahsûsuna kayd ile ketebe-i mûmâ-ileyhim nizâm-ı mer‘î üzere esnâf terekelerinin tahrîr ve tesviye-i müteferri‘âtına me’zûn olduklarından ba‘de ezîn mûmâ-ileyhim haklarında müteselsilen kefâlet-i kaviyye usûlünün ve şurût ve kuyûd-ı mesrûde-i sâirenin ale’d-devam icrâsıyla emvâl-i eytâmın mütemâdiyen emniyet-i tâm tahtında bulundurulması ve hilâf-ı nizâm bir gûne hâl ve hareket vukū‘a getirilmemesi husûslarına bezl-i cell-i miknet eyleyesin. Tahrîren fî 14 Rebî‘ülevvel sene [12]90.