Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 543 Hüküm no: 659 Orijinal metin no: [115a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Lütfiye bt. Abdullah’ın Mehmed b. Mustafa’dan muhâlaa yoluyla boşandığı Muhâla‘a Mahmiye-i İstanbul’da Hâcce Hâtun mahallesinde sâkine olup zâtını ma‘rifet-i şer‘iyye ile ârifân olan Hüseyin b. Nuh ve Mustafa b. Ömer ta‘rîfleriyle mu‘arrefe olan Lütfi[ye] bt. Abdullah nâm hâtun meclis-i şer‘-i şerîf-i enverde zevc-i dâhili bâ‘isü hâze’l-kitâb Mehmed b. Mustafa mahzarında bi tav‘ihâ ikrâr-ı tâm ve takrîr-i kelâm edip mezbûr Mehmed ile beynimizde hüsn-i zindegânîmiz olmayıp zimmetinde mütekarrir ve ma‘kūdun-aleyh olan iki bin akçe mehr-i müeccelim ve nafaka-i iddet-i mu‘ayyenem üzerlerine ve me’ûnet-i süknâm dahi kendi üzerime olmak üzre mezbûr Mehmed ile muhâla‘a-i sahîha-i şer‘iyye ile muhâla‘a olup ol dahi ber vech-i muharrer hul‘-ı mezbûru kabûl eylediğinden sonra hukūk-ı zevciyyete müte‘allika âmme-i da‘vâdan her birimiz âharın zimmetini ibrâ-i âmm-ı kātı‘ü’n-nizâ‘la ibrâ ve iskāt eyledik dediklerinde gıbbe[‘t-tasdîki’ş]-şer‘î mâ hüve’l-vâki‘ bi’t-taleb ketb olundu. Fi’s-sâdis aşer min şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: Es-Seyyid Ahmed Çelebi b. ( ), Mustafa b. Ömer, Hüseyin b. Ömer, Nalband Mehmed Çelebi, İbrahim Çelebi [b.] Ahmed, Hüseyin b. Mustafa, Mahmud b. Hüseyin.