İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 124 Hüküm no: 95 Orijinal metin no: [46-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Protesto varakalarının tezkiresiz olarak bir zarfa konulup üzeri nezaret mühürü ile mühürlenerek ilgili yerlere gönderilmesi Protesto varakaları hakkında Taraf-ı sâmî-i Meşîhat-penâhîye Bu dahi sadâret-i uzmâdan 93 Ma‘rûz-ı bende-i dîrîneleridir ki, Dersa‘âdet’de Ticâret De‘âvî Kalemi’nden bi’t-tasdîk cânib-i nezâretden bâ-tezkire devâire gönderilmekde olan protesto ve sekvestro varakalarının emr-i teblîğince teehhur vukū‘ bulmamak üzere ba‘demâ Ticâret De‘âvî Kalemi’nden tasdîk kılınacak olan bi’l-cümle protesto ve sekvestro varakalarının bilâ-tezkire bir zarf derûnuna vaz‘ ile üzeri nezâret mühürüyle bi’t-tahtîm doğrudan doğruya âid olduğu mecâlis veyâ idâreye irsâli hakkında Ticâret Nezâret-i celîlesinden bâ-tezkire vukū‘ bulan iş‘âr üzerine Dîvân-ı Ahkâm-ı Adliye’den verilen tezkire Şûrâ-yı Devlet’e lede’l-havâle sûret-i iş‘ârdan anlaşıldığı vechile zikrolunan protesto ve sekvestro varakalarının ta‘alluk eylediği idâre ve mecâlis ve mahkemelerin mensûb bulundukları devâire irsâliyle oradan mahallerine gönderilmekde olmasından ve tezkire terkīmi için lüzûmsuz olarak cereyân eden mu‘âmelât-ı kalemiyeden dolayı emr-i teblîgāt dûçâr-ı teehhur olmakda olup işbu protesto ve sekvestro varakalarının mahallerine sür‘at-i îsâli ise elzem idiğine binâen ber-mûceb-i iş‘âr ba‘de ezîn Ticâret De‘âvî Kalemi’nden tasdîk kılınacak olan bi’l-cümle protesto ve sekvestro varakaları bilâ-tezkire bir zarfa konulup üstü nezârete mahsûs mühür ile mühürlenerek doğrudan doğruya âid olduğu mahalle gönderilmesi husûsunun usûl ittizâzı tensîb olunarak keyfiyet dîvân-ı mezkûr nezâret-i celîlesine ve nezâret-i müşârün-ileyhâya vesâir bi’l-cümle devâir-i me’mûrîn-i kirâmına bildirilmiş olmağla emr ü irâde hazret-i men-lehu’l-emrindir. Fî 8 Rebî‘ülâhir sene [1]290 ve fî 22 Mayıs sene [1]289.