İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 124 Hüküm no: 96 Orijinal metin no: [46-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fesci esnafının terekelerinin eskiden olduğu gibi İstanbul mahkemesi kısmet-i belediyesince tahririne devam edilmesi Mahkemenin vazîfe ve salâhiyeti Mukābele şüd Akzâ kuzâtü’l-Müslimîn evlâ vülâti’l-muvahhidîn ma‘denü’l-fazli ve’l-yakīn râfi‘u a‘lâmi’ş-şerî‘ati ve’d-dîn vârisü ulûmü’l-enbiyâi ve’l-mürselîn el-muhtassu bi-mezîd-i inâyeti’l-meliki’l-mu‘în İstanbul kādısı olup ikinci rütbe Mecîdî nişân-ı zî-şânını hâiz ve hâmil olan Mevlânâ Ahmed Hıfzı Efendi -zîdet fezailehû- tevkī‘-i refî‘-i hümâyûnum vâsıl olucak mâ‘lûm ola ki İstanbul mahkemesi kısmet-i belediyesine tahsîs kılınmış olan esnâf-ı ma‘lûmeden fesci esnâfı terekeleri her nasılsa Rumeli kādıaskerliği tarafından tahrîr kılınmakda olduğundan bahisle men‘i istid‘â olunmuş ve keyfiyet Meclis-i Tedkīkāt-ı Şer‘iyye’ye lede’l-havâle ol bâbda cereyân eden <> müzâkerât ve tedkīkātı hâvî tanzîm olunan mazbata meâline nazaran esnâf-ı merkūmenin tereke ve husûsât-ı sâirelerinin tesviye ve rü’yeti bin yüz kırk sekiz târihinden ve muahharan te’kîdi hâvî bin yüz doksan iki senesinde şeref-sâdır olan iki kıt‘a fermân-ı âlîşân ile kısmet-i belediyeye tahsîs olunmuş olmasıyla Rumeli kādıaskerliğinden bu vakte kadar tahrîr-i tereke edilmesi tahsîs-i mezkûru nakz edemeyeceğinden ba‘de ezîn fesci esnâfından olup da vefât edenlerin beytü’l-mâle dokunmayan terekelerinin tahrîri ve bundan tevellüd edecek de‘âvînin dahi İstanbul kādılığı cânibinden rü’yet edilmesi iktizâ edeceği bi’l-fi‘il şeyhülislâm ve müfti’l-enâm olup murassa‘ Osmânî nişân-ı hümâyûnumla birinci rütbe Mecîdî nişân-ı zî-şânını hâiz ve hâmil olan a‘lemü’l-ulemâi’l-mütebahhırîn efdalü’l-fudalâi’l-müteverri‘în yenbû‘u’l-fazl ve’l-yakīn Mevlânâ Ahmed Muhtâr Efendi -edâmallâhu te‘âlâ fezâilehû- cânibinden ifâde olunmuş ve ol vechile icrâsı husûsuna irâde-i aliyyem müte‘allik olmuş olmağın mûcebince Dîvân-ı hümâyûnumdan işbu emr-i celîlü’l-kadrim ısdâr ve i‘tâ olundu. Sen ki mevlânâ-yı müşârün-ileyhsin, bâlâda beyân olunduğu üzere bundan böyle fesci esnâfından olup da vefât edenlerin beytü’l-mâle dokunmayan terekelerinin kısmet-i belediye ma‘rifetiyle tahrîri ve bundan tevellüd edecek de‘âvînin dahi orada rü’yet ve tesviye olunması ve işbu emr-i âlîşânımı dahi sicille kaydıyla infâz ve icrâ-yı ahkâmı husûslarına sarf-ı rü’yet eyleyesin. Tahrîren fî 12 Cumâdelûlâ sene 1290.