İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 125 Hüküm no: 97 Orijinal metin no: [46-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Protesto varakalarının tezkiresiz olarak bir zarfa konulup üzeri gönderilen tatbik mührü ile mühürlenmesi Makām-ı celîl-i cenâb-ı Meşîhat-penâhîye Ticâret Nezâreti’nden 9 Ma‘rûz-ı bende-i dîrîneleridir ki, Ticâret De‘avî Kalemi’nden bi’t-tasdîk cânib-i nezâret-i âcizîden bâ-tezkire devâire gönderilmekde olan protesto ve sekvestro varakalarının emr-i teblîğince teehhur vukū‘ bulmamak üzere ba‘demâ De‘âvî Kalemi’nden tasdîk kılınacak olan bi’l-cümle protesto ve sekvestro varakalarının bilâ-tezkire bir zarf derûnuna vaz‘ ile üzeri nezâret-i âcizî mührüyle bi’t-tahtîm doğrudan doğruya âid olduğu meclis veyâ idâreye irsâli hakkında bâ-tezkire-i âcizî vukū‘ bulan arz ve istîzân üzerine zikrolunan protesto ve sekvestro varakalarının ta‘alluk eylediği idâre ve meclis ve mahkemelerin mensûb bulundukları devâire irsâliyle idâreden mahallerine gönderilmekde olmasından ve tezkire terkīmi için nizâmsız olarak cereyân eden mu‘âmelât-ı kalemiyeden dolayı emr-i teblîgāt fi’l-hakīka dûçâr-ı teehhur olmakda olup işbu protesto ve sekvestro varakalarının mahallerine sür‘at-i îsâli ise elzem [47] idiğine binâen ber-mûceb-i iş‘âr ba‘de ezîn Ticâret De‘âvî Kalemi’nden tasdîk kılınacak olan bi’l-cümle protesto ve sekvestro varakalarının bilâ-tezkire bir zarafa konulup üstü nezârete mahsûs mühür ile mühürlenerek doğrudan doğruya âid olduğu mahalle gönderilmesi husûsunun usûl ittihâzı bi’t-tensîb keyfiyet Dîvân-ı Ahkâm-ı Adliye Nezâret-i celîlesine vesâir bi’l-cümle devâir-i me’mûrîn-i kirâmına bildirilmiş olduğu bâ-emirnâme-i sâmî cenâb-ı vekâlet-penâhî emr ü iş‘âr buyurulmasıyla keyfiyet kalem-i mezbûra lede’l-havâle iktizâ eden tatbîk mühürünün birer varakaya basılarak zikrolunan teblîgātın devâire hîn-i teslîminde alınacak olan makbûz pusulası veyâ imzâ herbir dâirenin kangı me’mûrlarından verilecek ise bâ-tezkire ta‘yîn edilmesi iktizâ-yı hâlden bulunduğu ifâde ve beyân olunmuş ve zikrolunan tatbîk mühürü leffen takdîm kılınmış olmasıyla ol vechile ta‘yîn olunacak me’mûrun defter-i mahsûsuna kaydolunmak üzere isminin iş‘ârı husûsuna himem-i aliyye-i cenâb-ı Meşîhat-penâhîlerinin sezâvâr buyurulması bâbında emr ü fermân hazret-i men-lehu’l-emrindir. Fî 26 Ca sene [12]90 ve fî 9 Temmuz sene [12]89. Mahmud Nezâret-i Ticâret Kalem-i De‘âvî