İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 126 Hüküm no: 98 Orijinal metin no: [47-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ecnebilerin emlâk tasarruf etmeleri hususundaki kanunu, Felemenk Devleti’nin de kabul ederek imzaladığı Felemenk Devleti teba‘asının tasarruf-ı emlâk etmeleri hakkında Taraf-ı vâlâ-yı Fetvâ-penâhîye Hâriciyeden 157 Ma‘rûz-ı bende-i dîrîneleridir ki, Memâlik-i mahrûse-i şâhânede teba‘a-i ecnebiyenin tasarruf-ı emlâk etmeleri hakkında cârî olan memnû‘iyetin ref‘iyle emlâk hakkında teba‘a-i saltanat-ı seniyyenin nâil oldukları hukūka bunların îfâ ettikleri vezâif ile mükellef olmak şart-ı esâsîsi ve şurût-ı sâire ile nâil olmalarına bi’l-müsâ‘ade ol bâbda yapılmış olan kānûnnâme-i hümâyûn işbu hukūka nâil oldukları hâlde memâlik-i şâhânede bulunacak ecânib hakkında cereyân etmesi lâzım gelen mu‘âmelâtı mutazammın olup devletlerin kabûl ve imzâlarına ta‘lîkan imlâ ve tenmîk kılınmış olan mazbata-i resmiyenin suver-i matbû‘ası mukaddemâ neşr ve i‘lân kılınmış idi. Zikrolunan mazbatanın ahkâm-ı mündericesini bu def‘a Felemenk Devleti dahi tamamen kabûl ederek işbu mazbata Bâbıâlî ile sefâret beyninde bu kerre imzâ ve te‘âtî olunmağla karâr-ı mezkûrun devlet-i müşârün-ileyhâ teba‘ası haklarında dahi mütesâviyen icrâ ettirilmesi lâzım gelmiş olmağın 20 R sene [12]85 târihinde tastîr olunan tezkirede bast ve temhîr kılınan vesâyâ vechile mu‘âmele olunması ve fakat bunların mazbata-i merkūmeyi henüz kabûl etmemiş olan devletler teba‘asından tefrîki zımnında Devlet-i metbû‘alarının Dersa‘âdet’de bulunan sefâretinden birer takrîr istihsâl eyledikden ve hâriciye kitâbet-i behiyesinden bu takrîrleri resmen tasdîk ettirdikden sonra iktizâ eden devâire mürâca‘at etmek zımnında ittihâz olunan usûl kemâ-kân bâkī olduğu beyânıyla tezkire-i âcizî terkīm kılındı. Ol bâbda emr ü irâde hazret-i men-lehu’l-emrindir. Fî 26 Cumâdelâhire sene [12]90 ve fî 7 Ağustos sene [12]89.