İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 127 Hüküm no: 99 Orijinal metin no: [47-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İranlıların haklarında gıyaben verilmiş olan hükümlere itiraz hakları olduğu Taraf-ı vâlâ-yı Fetvâ-yı penâhîye Hâriciyeden 195 Ma‘rûz-ı bende-i dîrîneleridir ki, Teba‘a-i İrânîye’nin berâ-yı muhâkeme ve mukaddemâ aleyhlerinde hükm-i gıyâbîyi hâvî verilmiş olan i‘lâmâtın icrâsı zımnında hod be-hod mehâkim ve devâire sûret-i cebriyede celb ve ihzâr olunmakda olduklarından bahisle sefâret arz-ı şekvâ etmekdedir. Eğerçi bu makūle mahkûm olanların ol sûretle celbleri aleyhlerinde verilen hükm-i gıyâbî i‘lâmâtı hakkında ale’l-usûl dermeyân-ı <> i‘tirâzât ile muvâcehe-i rü’yet-i da‘vâ için vaktiyle muhâkeme istid‘ânâme vermemelerine mübtenî olacağı derkâr ise de İrânîler cânibinden bu makūle istid‘ânâme verilmemesi sefâretleri tarafından bu bâbda vukū‘ bulan müdâhaleden ya‘ni mahkûmîn-i merkūmenin usûl-ı mezkûreye ri‘âyet etmemeleri hakkında sefâretin onlara icrâ eylediği tenbîhâtdan neşet etmiş olduğuna ve ba‘de ezîn böyle gıyâben mahkûm olacak İrânîlerin usûlü dâiresinde i‘tirâzât-ı vâkı‘alarını mutazammın evrâk-ı mukteziyeyi mehâkim taraflarına teblîğ etmek kā‘idesine ri‘âyet edeceklerine binâen bu esnâda ol sûretle mahkûm olan teba‘a-i İrânîye’nin i‘tirâz-ı ale’l-hükmetmiş addiyle işlerinin yeniden vicâhen rü’yeti husûsuna sefâretle karâr verilmiş ve keyfiyet bi’l-cümle devâir ve vilâyâta dahi yazılmış olmağla taraf-ı sâmîlerinden dahi ona göre îcâb-ı hâlin icrâsına himmet buyurulması siyâkında tezkire-i âcizî terkīm olundu. Ol bâbda emr ü irâde hazret-i men-lehu’l-emrindir. Fî-gurreti Şa‘bân sene [12]90 ve fî 11 Ağustos sene [12]89.