İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 130 Hüküm no: 101 Orijinal metin no: [49-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şer’i mahkemelerden verilen vesika ve senetlerin mahkeme sicilline kaydı ve muhAfazası ile alakalı talimat İstanbul Kādılığı cânib-i behiyesine Fazîletlü efendim hazretleri, Mehâkim-i şer‘iyeden verilen kâffe-i vesâik ve senedâtın bi-ibâretihâ sicill-i mahkemeye kaydı mine’l-kadîm taht-ı ehemmiyetde bulunduğu hâlde ba‘zı senedât-ı şer‘iye bilâ-kayd ashâbına verilmekde olduğu gibi sicillât dahi emniyetsizliği mûcib bir hâl ve idârede bulundurulduğu istimâ‘ olunduğuna ve sâye-i ıslâhat-vâye-i hazret-i hilâfet-penâhîde bu hâlin ıslâhıyla istikbâli te’mîn eder sûretde kâffe-i mehâkim-i şer‘iye için muttarid bir kā‘ide vaz‘ ve te’sîsine lüzûm görüldüğüne binâen ol bâbda meclis-i tedkīkāt-ı şer‘iyede kaleme aldırılan ta‘lîmâtın suver-i matbû‘asından beşer nüshası leffen tesyîr-i sûy-ı fâzılâneleri kılındı. Medlûlünün tamamî-i icrâsına sa‘y ve himmet ve dâire-i külliyelerine mensûb mehâkim-i şer‘iyeye birer adedinin i‘tâsıyla ahkâm-ı mündericesine tevfîk mu‘âmele edilmesi zımnında vesâyâ-yı lâzıme ve tenbîhât-ı ekîde icrâsına mübâderet buyurulması siyâkında tezkire-i senâverî terkīm kılındı. Fî 21 Zilhicce sene [12]90 ve fî 28 Kânûn-ı sânî sene [12]89. Ahmed Muhtâr