Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 544 Hüküm no: 660 Orijinal metin no: [115a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kirkor v. Gasal’ın Panek v. İmlek’in atını haksız yere aldığı İstihkāk-ı bârgir Mahmiye-i İstanbul’da Hamamcı Muhyiddin mahallesinde sâkin Panek v. İmlek nâm zimmî meclis-i şer‘-i şerîf-i enverde Kirkor v. Gasal nâm zimmî muvâcehesinde üzerine da‘vâ ve takrîr-i kelâm edip işbu meclis-i şer‘de mevcûd ve müşâhed bir re’s kır bârgir benim mülk ve hakkım iken merkūm Kirkor bi gayri hakkın vaz‘-ı yed eder suâl olunup mârrü’z-zikr bârgirden kasr-ı yed ve bana teslîme tenbîh olunmak matlûbumdur dedikde gıbbe’s-suâl mezbûr Kirkor cevâbında müdde‘î-i mezbûrun li ebeveyn karındaşı işbu hâzır bi’l-meclis Mikayil nâm zimmî bârgir-i mezkûru kendi mülkü olmak üzre dokuz esedî guruşa bana bey‘ ve teslîm ben dahi iştirâ ve kabz eylediğimden sonra semeni olan meblağ-ı mezbûr dokuz guruş zimmetinde cihet-i deyn-i şer‘îden lâzımü’l-edâ bana deyni olan yirmi sekiz esedî guruşun dokuz guruşuna takās edip ben dahi mukāssa ve kabûl edip mârrü’z-zikr bârgir mülk-i müşterâm olmağla vaz‘-ı yed ederim müdde‘î-i mezbûrun mülkü olduğu ma‘lûmum değildir deyicek müdde‘î-i mezbûrdan müdde‘âsına beyyine taleb olundukda mahalle-i mezbûre sükkânından Davud b. Osman ve Osman b. Cafer nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka işbu meclis-i şer‘de mevcûd ve müşâhed bir re’s kır bârgir müdde‘î-i mezbûr Panek v. İmlek’in mülkü ve hakkıdır biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olup müdde‘î-i mezbûr bârgir-i mezbûru âhara bey‘a karındaşı mezbûr mukābele izin vermeyip ve taraf-ı şer‘iyyeden bir tarîk ile mülkünden ihrâc etmediğini ba‘de’t-tahlîfi’ş-şer‘î mûcebince mârrü’z-zikr bârgirden kasr-ı yed ve müdde‘î-i mezbûra teslîme merkūm Kirkor’a tenbîh olunup mâ vaka‘a bi’t-taleb ketb olundu. Fi’l-yevmi’s-sânî aşer min Ramazâni’l-mübârek li sene seb‘a ve tis‘în ve elf. Şuhûdü’l-hâl: İbrahim Çelebi b. Ahmed, Hasan b. Mehmed, Hüseyin b. Mehmed, Mahmud b. ( ), Hüseyin b. Mustafa, Mehmed b. Ahmed.