İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 133 Hüküm no: 105 Orijinal metin no: [51-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul Kadılığı’na Ahmed Hulusi Efendi’nin tayini Hâlâ Dârü’l-hılâfeti’l-aliyye kādısı Şirdânîzâde fazîletlü Ahmed Hulusi Efendi hazretlerinin zamanlarında vukū‘ bulan fermân-ı âli Fî-gurreti Rebî‘ülâhir sene [1]291 Akzâ kuzâtü’l-Müslimîn evlâ vülâti’l-muvahhidîn ma‘denü’l-fazl ve’l-yakīn râfi‘u a‘lâmi’ş-şerî‘ati ve’d-dîn vârisü ulûmü’l-enbiyâi ve’l-mürselîn el-muhtassu bi-mezîd-i inâyeti’l-meliki’l-mu‘în İstanbul pâyelülerinden olup Mecîdî nişân-ı zî-şânının ikinci rütbesini hâiz ve hâmil olan Mevlânâ Ahmed Hulusi Efendi -zîdet fezailehû- tevkī‘-i refî‘-i hümâyûnum vâsıl olucak ma‘lûm ola ki sen ki mevlânâ-yı mûmâ-ileyhsin sen akrân ve emsâlinin beyninde gevher-i ilm ve fazl ile mütehallî ve mevsûf olup her vechile sezâvâr-ı inâyet ve şâyeste-i mekremet olduğuna mebnî işbu bin iki yüz doksan bir senesi şehr-i Rebî‘ülâhiri gurresinden zabtetmek üzere İstanbul Kādılığı uhdene tevcîh ve ihsân kılınması husûsu bi’l-fi‘il şeyhülislâm ve müfti’l-enâm olup murassa nişân-ı Osmânî ile Mecîdî nişân-ı zî-şânınının birinci rütbelerini hâiz ve hâmil olan a‘lemü’l-ulemâi’l-mütebahhırîn efdalü’l-fudalâi’l-müteverri‘în yenbû‘u’l-fazli ve’l-yakīn Mevlânâ Ahmed Muhtâr Efendi -edâmallâhu te‘âlâ fezâilehû- telhîs etmeleriyle mûcebince hakkında mezîd inâyet-i aliyye-i şâhâne ve mezîd re’fet-i seniyye-i pâdişâhânem zuhûra gelip avâtıf-ı aliyye-i mülûkâne ve avârif-i behiye-i tâc-dâvânemden mevhibet-efzâ-yı sünûh ve sudûr olan emr-i hümâyûn-ı şevket-makrûn-ı şâhânem muktezâ-yı münîfi üzere işbu fermân-ı celîlü’l-unvân-ı pâdişâhânem ısdâr ve i‘tâ olundu. Zikr olunan İstanbul Kādılığı’na gurre-i merkūmeden mutasarrıf olup icrâ-yı ahkâm-ı şerî‘at-i nebeviyeye bezl-i makdûr ve sa‘y-i mevfûr eyleyesin. Fî 27 Rebî‘ülevvel sene [12]91. Mukābele şüd