Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 545 Hüküm no: 661 Orijinal metin no: [115a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Osman’ın Ömer b. Mustafa’dan muhâlaa yoluyla boşandığı Muhâla‘a hüccetidir. Mahmiye-i İstanbul’da Çukur mahallesinde sâkine Ayşe bt. Osman nâm hâtunun zâtını ma‘rifet-i şer‘iyye ile ârifân Osman b. Mahmud ve Mehmed b. Mustafa nâm kimesneler ta‘rîfleriyle mu‘arrefe oldukdan sonra meclis-i şer‘-i şerîf-i enverde zevc-i muhâlı‘ı işbu bâ‘isü’l-kitâb Ömer b. Mustafa nâm kimesne mahzarında ikrâr ve takrîr-i kelâm edip mezbûr Ömer zevcim olup hüsn-i mu‘âşeretimiz olmamağla zimmetinde mütekarrir ve ma‘kūdun-aleyh olan iki bin akçe mehr-i müeccelim ve nafaka-i iddet-i ma‘lûmem üzerlerine ve me’ûnet-i süknâm dahi kendi üzerime olmak üzre zevcim merkūm Ömer ile muhâla‘a-i sahîha-i şer‘iyye ile muhâla‘a edip ol dahi hul‘-ı mezbûru ba‘de’l-kabûl hukūk-ı zevciyyete ve gayra müte‘allika âmme-i da‘vâdan mezbûr Ömer’in zimmetini ibrâ-i âm ile ibrâ ve iskāt eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâdis aşer min şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: İbrahim Çelebi b. Ahmed, Mustafa Çelebi b. Ahmed, Mehmed Çelebi b. İdris, Hüseyin Çelebi b. Mustafa.