İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 140 Hüküm no: 116 Orijinal metin no: [54-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Amerika tebasının müstear ad ile satın aldıkları emlakı kendi adlarına intikali süresinin uzatıldığı Taraf-ı âlî-yi hazret-i Fetvâ-penâhîye Ma‘rûz-ı bende-i dîrîneleridir ki, Geçende istimlâk-i emlâk mazbatasını kabûl ve imzâ etmiş olan Amerika hükûmet-i müctemi‘ası teba‘asının mukaddemâ nâm-ı müste‘âr ile mübâya‘a eyledikleri emlâkin kendi isimlerine intikālinde altı mâh zarfında sülüs harc alınması karârlaşdırılmış ve keyfiyet ta‘mîmen iktizâ edenlere bildirilmiş idi. Bu kerre müddet-i mezkûrenin işbu Mart hulûlünde münkaziye olacağından ve Hisar Mektebi’ne müte‘allik emlâkin icrâ-yı nakl ve ferâğı biraz vakte tevakkuf eylediğinden bahisle işbu müddetin Mart’dan i‘tibâren üç mâh daha temdîdi iltimâs olunmuş ve iktizâ-yı hâl sâir lâzım gelenlere dahi bildirilmiş olmağla taraf-ı âlî-yi Meşîhat-penâhîlerinden dahi hâriciyeden ona göre îfâ-yı muktezâsına himem-i aliyye-i Fetvâ-penâhîleri derkâr buyurulmak bâbında emr ü fermân hazret-i men-lehu’l-emrindir. Fî 10 Muharrem sene [1]292 ve fî 5 Şubat sene [1]290.