İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 141 Hüküm no: 117 Orijinal metin no: [55-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul Kadısı Ahmed Hulusi Efendi’nin Anadolu Kazaskerilği’ne tayini İstanbul kādısının Anadolu Kādıaskerliği’ne ta‘yîni fermânı A‘lemü’l-ulemâi’l-mütebahhırîn efdalü’l-fudalâi’l-müteverri‘în yenbû‘u’l-fazli ve’l-yakīn keşşâfü’l-müşkilâti’d-dîniye hallâlü’l-mu‘dılâti’l-yakīniye miftâhu künûzi’l-hakāyık isbâhu rumûzi’d-dekāyık el-mahfûfu bi-sunûf-i avâtıfi’l-meliki’l-a‘lâ hâlâ İstanbul kādısı ve Mecîdî nişân-ı zî-şânının üçüncü rütbesini hâiz ve hâmil olan Şirvânî İsmail Efendizâde Mevlânâ es-Seyyid Ahmed Hulusi Efendi -edâmallâhu te‘âlâ fezâilehû- tevkī‘-i refî‘-i hümâyûnum vâsıl olucak ma‘lûm ola ki sen ki mevlânâ-yı müşârün-ileyhsin, sen halîle-i hasene-i ilm ü irfân ile mütehallî ve mevsûf ve gevher-i gîrân-bahâ-yı fazl ve kemâl ile müştehir ve ma‘rûf olarak her vechile sezâvâr-ı inâyet ve şâyeste-i mekremet olduğuna mebnî hakkında mezîd inâyet-i aliyye-i şâhâne ve mezîd re’fet-i seniyye-i pâdişâhânem zuhûra gelip avâtıf-ı aliyye-i mülûkâne ve avârif-i behiye-i tâc-dârânemden şeref-efzâ-yı sünûh ve sudûr olan emr ü irâde-i ihsân-âde-i şehin-şâhânem muktezâ-yı münîfi üzere işbu bin iki yüz doksan iki senesi şehr-i Rebî‘ülevveli’nin beşinci gününden i‘tibâren Anadolu kādıaskerliği pâye-i celîli uhdene tevcîh ve ihsân kılınması husûsunu bi’l-fi‘il şeyhülislâm ve müfti’l-enâm olup murassa‘ nişân-ı Osmânî ile Mecîdî nişân-ı zî-şânının birinci rütbelerini hâiz ve hâmil olan a‘lemü’l-ulemâi’l-mütebahhırîn efdalü’l-fudalâi’l-müteverri‘în yenbû‘u’l-fazli ve’l-yakīn Mevlânâ Hasan Fehmi Efendi -edâmallâhu te‘âlâ fezâilehû- telhîs etmeleriyle mûcebince pâye-i mezkûre nâiliyetini mutazammın işbu fermân-ı celîlü’l-unvân-ı pâdişâhânem ısdâr ve i‘tâ olundu. Zikrolunan Anadolu kādıaskerliği pâye-i celîline târih-i merkūmdan i‘tibâren mutasarrıf ve nâil olup temâdî-yi eyyâm-ı ömr-i devlet ve ikbâl-i pâdişâhânem da‘avâtına muvâzabet ve iştigāl üzere olasın. Tahrîren fi’l-yevmi’s-sâdis min-şehri Rebî‘i’l-evvel sene isnâ ve tis‘în ve mieteyn ve elf.