Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 545 Hüküm no: 662 Orijinal metin no: [115a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed b. Ali’nin Osman b. Hacı Mehmed’den ödünç ve tevliyet alıvermek için para aldığı Edâya tenbîh. Mahmiye-i İstanbul’da Mahmud Paşa hanında sâkin işbu râfi‘ü’l-kitâb Osman b. el-Hâc Mehmed nâm kimesne meclis-i şer‘-i şerîf-i enverde mahmiye-i mezbûrede Küçük Langa kurbunda sâkin Ahmed b. Ali nâm kimesne mahzarında üzerine da‘vâ ve takrîr-i kelâm edip târih-i kitâbdan iki ay mukaddem mezbûr Ahmed’e yetmiş bir esedî guruşumu ikrâz ve teslîm ol dahi iktirâz ve kabz eylediğinden sonra Dârü’s-sa‘âdeti’s-seniyye ağası hazretlerinden bana beynimizde ma‘hûde bir tevliyyet alıverilmek için altı yüz guruş ve husûs-ı mezbûrda vâsıta olan Ahmed Ağa nâm kimesneye teslîm için iki yüz guruş ki cem‘ an sekiz yüz guruş dahi def‘ ve teslîm ol dahi ahz u kabz eylediğinden sonra tevliyyet-i mezbûreyi alıvermemekle ber vech-i muharrer makbûzu olan sekiz yüz guruşun üç yüz elli guruşunu bana def‘ ve teslîm ben dahi ahz u kabz edip bâkī dört yüz elli guruşunu kendi mesârifine sarfla [115b] istihlâk etmişdir hâlâ mezbûr Ahmed’e suâl olunup hâlâ ber vech-i muharrer iktirâz eylediği yetmiş bir guruş ile meblağ-ı bâkī-i mezbûr dört yüz elli guruş ki cem‘an beş yüz yirmi bir guruşun alıverilmesi matlûbumdur dedikde gıbbe’s-suâl mezbûr Ahmed cevâbında târih-i mezkûrede müdde‘î-i mezbûrdan ber vech-i muharrer yetmiş bir guruş iktirâz ve kabz ve Ağa-yı müşârün-ileyhden tevliyyet-i mezkûreyi alıvermek için ber vech-i muharrer altı yüz guruş ahz u kabz eylediğimden sonra husûs-ı mezbûrun husûlü müyesser olmamağla meblağ-ı mezbûr altı yüz guruşun üç yüz elli guruşunu kabzına mu‘terif olduğu üzre kendiye edâ ve teslîm ve bâkī iki yüz elli guruşu kendi mesârifime sarfla istihlâk etmişidi deyû vech-i muharrer üzre müdde‘î-i mezbûrdan iktirâz eylediği yetmiş bir guruş ile kendi mesârifine sarf eylediği iki yüz elli guruş ki cem‘an üç yüz yirmi guruşu müdde‘î-i mezbûr Osman, Derviş Ali nâm kimesneye teslîm eyle deyû bana def‘ ve teslîm ben dahi ba‘de’l-ahz mezbûrun emrine binâen merkūm Derviş Ali’ye teslîm etmişdim deyip merkūm Ahmed Ağa’ya teslîm için ahzını inkâr edicek müdde‘î-i mezbûrdan meblağ-ı mezbûr iki yüz guruşu mezbûr Ahmed Ağa’ya teslîm emrini mübeyyine beyyine taleb olundukda ityân-ı beyyine için istimhâl etmekle mehil-i şer‘î birle ba‘de’l-imhâl ikrârı mertebesi olan meblağ-ı mezbûr üç yüz yirmi bir guruşu mezbûr Osman’a edâya mezbûr Ahmed’e tenbîh olunup mâ hüve’l-vâki‘ bi’t-taleb ketb olundu. Fi’l-yevmi’s-sânî aşer min şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: İbrahim Çelebi [b.] Ahmed, Mustafa Çelebi [b.] Ahmed, sarrâc Halil Beşe, Mehmed b. İdris, Hasan b. Mahmud.