Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 546 Hüküm no: 663 Orijinal metin no: [115b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. İbrahim’e olan borcunu ödemesi için İbrahim b. Mehmed’e tembih Edâya tenbîh Mahmiye-i İstanbul’da Tercüman Yunus mahallesi sükkânından iken bundan akdem fevt olan Kavukcu el-Hâc İbrahim b. Sefer nâm kimesnenin verâseti zevce-i metrûkesi Ayşe bt. İbrahim nâm hâtun ile evlâd-ı sıgārı Ömer ve İsmail ve Fâtıma’ya münhasıra olduğu şer‘an zâhir ve müte‘ayyin oldukdan sonra kendi tarafından asîl ve sıgār-ı mezbûrûnun tesviye-i emirlerine vasiyy-i mansûbe olan mezbûre Ayşe meclis-i şer‘-i şerîf-i enverde kavukcu tâifesinden İbrahim b. Mehmed nâm kimesne mahzarında asâleten ve vesâyeten üzerine da‘vâ ve takrîr-i kelâm edip müteveffâ-yı merhûm el-Hâc İbrahim’in terekesinden olup mahmiye-i mezbûrede Karaman sûkunda vâki‘ bir bâb kavukcu dükkânında mevcûd beynimizde ma‘lûm kavuk ve çuka ve sâir kavukcu âlâtı merkūm İbrahim’e asâleten ve vesâyeten altı bin akçeye bey‘-i kat‘î ile bey‘ ve teslîm edip ol dahi iştirâ ve kabûl ve tesellüm etmişidi hâlâ semen-i mezbûru taleb eylediğimde bana edâda imtinâ‘ eder suâl olunup semen-i mezbûrun alıverilmesi asâleten ve vesâyeten matlûbumdur dedikde gıbbe’s-suâl mezbûr İbrahim cevâbında fi’l-hakīka kaziyye vech-i muharrer üzre olup müteveffâ-yı mezbûrun terekesinden sâlifü’z-zikr dükkânda mevcûd adedi beynlerinde ma‘lûm kavuk ve çuka ve sâir kavukcu âlâtını müdde‘iye-i mezbûreden altı bin akçeye iştirâ ve kabûl ve kabz eylediğini tâyi‘an ikrâr ve i‘tirâf etmeğin mûcebince meblağ-ı mezbûru müdde‘iye-i mezbûreye edâya mezbûr İbrahim’e tenbîh olunup mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ aşer min şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: Mehmed b. Yusuf, Mustafa Çelebi Kethüdâ, Mehmed Çelebi b. Ahmed, İbrahim Çelebi b. el-Hâc Mustafa.