Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 547 Hüküm no: 664 Orijinal metin no: [115b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yusuf Ağa b. Abdullah’ın kölesi Musli’yi azat etmesi Itknâme Mahrûse-i Edirne’de Sarıcapaşa mahallesi ahâlîsinden olup hâlâ mahmiye-i İstanbul’da Şehzâde câmi‘-i şerîfi kurbunda müsâferet vechi üzre sâkin Yusuf Ağa b. Abdullah tarafından husûs-ı âti’l-beyâna vekîl olduğu Hüseyin Bey b. Abdullah ve Mehmed Çelebi b. İbrahim nâm kimesneler şehâdetleriyle şer‘an sâbit olan Mehmed Efendi b. el-Hâc Mehmed nâm kimesne meclis-i şer‘-i şerîf-i enverde bi’l-vekâle ikrâr-ı tâm ve takrîr-i kelâm edip müvekkil-i merkūm Yusuf Ağa kendiye rıkkını mu‘terif olan işbu orta boylu açık kara kaşlı kara gözlü Gürciyyü’l-asl bâ‘isü’l-kitâb Musli b. Abdullah nâm memlûkünü, hasbeten lillâhi’l-meliki’l-Hallâk ve taleben li merzâti’r-rabbi’r-Rezzâk malından tahrîr ve i‘tâk ve zümre-i ahrâr-ı asliyyîne idrâc ve ilhâk eyledim ba‘de’l-yevm mevsûf-ı mezbûr Musli sâir ahrâr-ı asliyyîn gibi hür olmuşdur üzerinde velâ-i şer‘îden gayrı hakkım kalmadı dedikde mâ vaka‘a bi’t-taleb ketb olundu. Fi’l-yevmi’s-sâmin aşer min şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: İbrahim Çelebi b. Abdullah, Ahmed Bey b. Mehmed el-Cündî, Ebûbekir Çelebi b. İbrahim, Şeyh Mehmed Efendi, Halil Çavuş b. İbrahim, Ahmed Çelebi b. Ali, Ömer Bey b. Abdullah.