İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 171 Hüküm no: 163 Orijinal metin no: [17-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şahıslara ait davaların geciktirilmeden sonuçlandırılması Taraf-ı sâmî-i Meşîhat-penâhîye Bâbıâlî Dâire-i Sadâret-i uzmâ Ma‘rûz-ı bende-i dîrîneleridir ki, Mesâlih-i Devlet-i ve ibâdın vakt [ü] zamanıyla rü’yet ve temşiyete teehhurdan vikāyesi be-gāyet matlûb ve mültezem olduğu hâlde dâirelerce işlerin teehhur ettiğine dâir ba‘zı rivâyât ve şikâyât vukū‘ bulmakdadır. Hasebü’l-vakt ve’l-hâl umûr-ı mühimmenin sür‘at-i cereyânı ehem ve elzem olduğu gibi mesâlih-i şahsiyenin dahi vakt ü zamanıyla rü’yet ve tesviyesine sür‘atle bir gûne şikâyete mahâl bırakılmaması akdem-i vezâif-i hükûmetden bulunduğuna ve bu dahi bi’l-cümle me’mûrîn ve zâbıtân ve ketebe aklâmının mahâll-i me’mûriyetlerine devam ve îfâ-yı vezâife sarf-ı mesâ‘î ve ikdâm eylemeleriyle hâsıl olacağına mebnî [18] ol bâbda devâire teblîgāt-ı mukteziye icrâ kılınmış olmağla Bâb-ı Vâlâ-yı Fetvâ-penâhîlerince dahi o misillü işlerin teehhurundan vikāyesi zımnında iktizâ edenlere tenbîhât-ı lâzımenin icrâsı bâbında emr ü irâde hazret-i men-lehu’l-emrindir. Fî 4 Zilka‘de sene [1]295 ve fî 18 Teşrîn-i evvel sene [12]94. Safvet