İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 172 Hüküm no: 164 Orijinal metin no: [18-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eytâm mal sandıklarından alınan borçların senetle teminat altına alınması Sâye-i ihsân-vâye-i hazret-i Fetvâ-penâhîlerinde me’mûru buyrulduğum eytâm müdürünün başlıca vazîfesi idâne olunan emvâl-i eytâmın taht-ı te’mîne alınması kazıyye-i mühimmesi olup bu da iki sûretle cereyân etmekdedir. Birinci rehin veyâ bedel mukābili verilen emvâldir ki, işbu emvâl mukābilinde te’mînât-ı kâfiye olunmakdadır. Fakat ikinci kefâlet ile verilen emvâldir. Bunda ise kefâletin iktidârlarına hakkıyla ve tamamıyla dikkat ve i‘tinâ olunamamasından veyâ hîn-i ikrâzdaki yüsrleri bilâhare usre münkalib olmasından aslında ve nemâsında zıyâ‘at vukū‘u melhûz olmasından emvâl-i eytâm nizâmnâmesinin tasrîh edildiğine göre kefîl olacak zâtı sonra bir diyeceği kalmamak için kefîl olduğu akçeyi kendi mal ve emlâkinden tazmîn eylemesi lâzım geldiği takdîrde te’diyeye bi’n-nefs râzı olduğunu mübeyyin sened vererek sened-i mezkûr verilen mâlın sandığında hıfz olunması musarrah ise de bu husûs-ı mu‘tenâya şimdiye kadar nazar-ı i‘tinâ ve dikkate alınmadığından muvâfık-ı irâde-i aliyye-i hazret-i Meşîhat-penâhîleri buyururlar ise ancak burası mevki‘-i tedkīk ve müzâkereye alınarak bu bâbda verilecek karâra tatbîkan işin mevki‘-i icrâya alınması zımnında işbu takrîr-i dâ‘iyânenin Meclis-i İdâre-i Emvâl-i Eytâm’a havâle buyurulması mütevakkıf-ı fermân-ı devletleridir, her hâlde emr ü irâde hazret-i men-lehu’l-emrindir. Fî-gurreti Ramazan esne [1]295. Mahmud Aziz