İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 172 Hüküm no: 165 Orijinal metin no: [18-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eytâm mal sandıklarından verilen borçların senet ve kefil ile teminat altına alınması Huzûr-ı âlî-yi hazret-i Meşîhat-penâhîye Eytâm Müdüriyet-i behiyesinden bi’t-takdîm Meclis-i İdâre-i Emvâl-i Eytâm’a havâle buyrulan ve leffen yine i‘âde ve takdîm-i pîşgâh-ı sâmî-i hazret-i Fetvâ-penâhî kılınan takrîr mütâla‘a olundu. Bunun hülâsa-i meâli Eytâm Müdüriyeti’nin başlıca vazîfesi idâne olunan emvâl-i eytâmın taht-ı te’mîne alınması kazıyye-i mühimmesi olup bu da iki sûretle cereyân etmekde olarak birinci rehin veyâ bedel mukābili verilen emvâldir ki, bunun mukābilinde te’mînât-ı kâfiye alınmakda olup fakat ikincisi de kefâletle verilen emvâl olup kefâletin iktidâ ve vüs‘lerine hakkıyla ve tamamıyla dikkat ve i‘tinâ olunamamasından veyâhûd hîn-i ikrâzda olan yüsrleri muahharan usre mübeddel olmasından emvâl-i eytâm aslından ve nemâsından zâyi‘ât vukū‘u melhûz olmasından ba‘demâ husûsât-ı mezkûrede kefîl olacak zevâtın emvâl nizâmnâmesinde gösterildiği vechile kefîl oldukları akçenin sonra bir diyecekleri kalmamak için kendü emvâl ve emlâkinden tazmîn eylemesi lâzım geldiği takdîrde te’diyeye bi’n-nefs râzı olduğunu mübeyyin bir sened alınarak eytâmın sandığında hıfz olunması her vechile ehem ve elzem bulunduğundan Meclis-i Emvâl-i Eytâmca taht-ı karâra alınarak ba‘demâ ol vechile mer‘iyyü’l-icrâ tutulması arz ve iş‘ârından ibâret olduğu anlaşılmışdır. Takrîr-i mezkûr meâli muvâfık-ı hâl ve maslahat bulunmasıyla ba‘demâ ol vechile düstûrda münderic mezkûr nizâm-ı mahsûsuna tatbîkan îcâbının icrâsı lâzım geleceğinin müdüriyet-i müşârün-ileyhâya irâde ve fermân buyurulması tezekkür kılınmışdır. Ol bâbda ve her hâlde emr ü fermân hazret-i men-lehu’l-emr<> ve’l-ihsânındır. Fî 13 Şevval sene [1]295. Meclis-i İdâre-i Emvâl-i Eytâm