İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 175 Hüküm no: 167 Orijinal metin no: [22-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’da bulunan Rumeli muhacirlerinin Rumeli’deki emlakın alım-satım muamelesinin ancak Rumeli kazaskerliği tarafından yapılacağı İstanbul Kādılığı’na Fazîletlü efendim hazretleri, Rumeli kıt‘asında vâki‘ olup bâyi‘ ve müşterisi Dersa‘âdet’de bulunan emlâk ve akārın mu‘âmele-i bey‘ ü şirâsı hasebi’n-nizâm Rumeli Kādıaskerliği’ne âid olduğu hâlde bu aralık muhâcireten İstanbul’da bulunan Rumeli ahâlîsinden ba‘zıları Dersa‘âdet ve bilâd-ı selâsede kâin mehâkim-i şer‘iye-i sâireye mürâca‘atla memleketlerindeki emlâk ve akārlarını yekdiğerine ve ba‘zıları dahi teba‘a-i ecnebiyeye bey‘ ederek bu bâbda mehâkim-i mezkûre cânibinden dahi hüccetler i‘tâ olunmakda idiğinden ve nizâmnâme-i mezkûrun on birinci maddesi mûcebince bir mülkün mübâya‘a ve mu‘âmelât-ı sâiresinin hîn-i icrâsında mehâkim-i şer‘iye tarafından mürâ‘ât olunması iktizâ eden usûl ve tahkīkāta dahi ri‘âyet olunmamakda olduğundan bahisle muhâlif-i nizâm mübâya‘ât icrâsına tesâddî olunmaması husûsunun mehâkim-i mezkûre me’mûrlarına tenbîh ve tavsiyesi sadr-ı Rumeli semâhatlü efendi hazretleri tarafından bâ-takrîr ifâde ve ol vechile îfâ-yı muktezâsı Meclis-i İntihâb-ı Hükkâm’dan tensîb kılınmış olmağla nizâmnâme-i mezkûrun ahkâmına tevfîk hareket buyurulması siyâkında tezkire-i senâverî terkīm kılındı. Fî 28 Zilhicce sene [1]295 ve fî 11 Kânûn-ı evvel sene [12]94. Ahmed Esad