İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 175 Hüküm no: 168 Orijinal metin no: [22-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüküm verilmeyip neticesiz kalan istidaların gerekçelerinin Bâbıâlî’ye bildirilmesi Taraf-ı âlî-yi Meşîhat-penâhîye Bâbıâlî Dâire-i Sadâret-i uzmâ Ma‘rûz-ı bende-i dîrîneleridir ki, Mesâlih-i devletin vakt ü zamanıyla tesviyesiyle teehhurdan vikāyesi nasıl ehem ve elzem ise hükûmet-i seniyyeye âid mesâlih-i şahsiyenin dahi kemâl-i tedkīk ve hakkāniyet ile rü’yet ve temşiyeti ol derece matlûb ve mültezem olduğundan işbu makāsıd-ı asliyenin husûlüne delâlet edecek ikdâmât ve mesâ‘înin her dâirece tamamî-i îfâsıyla müsted‘iyât-ı vâkı‘anın usûl ve nizâmı dâiresinde sür‘at-i mümkine ile tesviyesi lâzım geleceği gibi ashâb-ı mesâlihden Bâbıâlî’ye mürâca‘atla müsted‘iyâtı âid olduğu devâire havâle ve iş‘âr olunagelenlerin işleri tesviye olunanlardan mâ‘adâ haksızlıkdan veyâhûd esbâb-ı sâireden dolayı istid‘âlarının hükmü olmayıp kendilerine cevâb i‘tâsı îcâb edenlerin içlerinden ba‘zılarının adem-i kanâ‘atle be-tekrâr Bâbıâlî’ye mürâca‘atları vukū‘unda hem beyhûde muhâberât ile iştigāl olunmamak ve hem de müsted‘îler husûl-i makāsıd-ı emniyesi ile dûçâr-ı sefâlet olmayarak ecvibe-i lâzımeyi almak üzere ba‘demâ Bâbıâlîce devâire havâle ve iş‘âr olunan o misillü müsted‘iyâtdan hükm ve netîcesiz olanların esbâb-ı mûcibe-i hakīkiyesi gösterilerek Bâbıâlî’ye bildirilmesi sûretinin mer‘iyyü’l-icrâ tutulması bi’l-cümle devâire bildirilmiş olmağla Bâb-ı Vâlâ-yı Meşîhat-penâhîlerince dahi ona göre hareket ve îfâ-yı mu‘âmele-i i‘tinâ ve himmet buyurulması bâbında emr ü irâde hazret-i men-lehu’l-emrindir. Fî 26 Zilhicce sene [1]295 ve fî 9 Kânûn-ı evvel sene [1]294.