İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 181 Hüküm no: 178 Orijinal metin no: [25-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İcraya konulmayan mahkeme ilamlarının çoğalması sebebiyle bundan böyle ilamların hükmü veren mahkemece uygulanması Adliye ve Mezâhib Nezâreti Huzûr-ı ma‘âlî-mevfûr-ı hazret-i Meşîhat-penâhîye Ma‘rûz-ı bende-i dîrîneleridir ki, İ‘lâmât-ı hukūkiye ve ticâriyenin suver-i icrâiyesine dâir tanzîm olunan nizâm-ı lâyihası hükmünce ve hükm ü tenfîz maddelerinin mahkemede ictimâ‘ı kā‘idesince Dersa‘âdet ve Beyoğlu ve Üsküdar Bidâyet Mahkemeleri reislerinin taht-ı riyâsetlerinde olan mahkemeler ile hükûmetleri dâhilindeki mevki‘ bidâyet mahkemelerinin ve Dersa‘âdet reis-i evvelinin dahi mahkeme-i mezkûreyi teşkîl eden devâirden verilen i‘lâmlar ile onların üzerine istînafen sâdır olan i‘lâmâtı ve yine Dersa‘âdet bidâyet mehâkimi rüesâsıyla mahkeme-i ticâret reis-i evvelinin dâire-i hükûmetlerinde mukīm eşhâs aleyhine memâlik-i şâhânenin sâir mehâkim-i hukūkiye ve ticâriyesinden verilen i‘lâmları icrâ eylemeleri ve vilâyet ve livâ ve kazâ merkezlerindeki bidâyet mahkemeleri riyâsetlerinin dahi me’mûr oldukları mahkemeler ile makarr-ı me’mûriyetlerindeki şerî‘at ve ticâret mahkemelerinden verilen i‘lâmları ve bidâyet ve ticâret mahkemelerinin derece-i ûlâ hükümleri üzerine sâdır olan istînaf i‘lâmâtını ve dâire-i hükûmetlerinde mukīm eşhâs aleyhine mehâkim-i sâire-i Osmâniye’den verilen i‘lâmları kezâlik icrâya me’zûn olmaları mukarrer olup Dersa‘âdet’de kâffe-i mehâkim-i şer‘iye ve nizâmiyeden çıkan i‘lâmâtın icrâsı Adliye Nezâreti’nde bulunan İcrâ Cem‘iyeti’ne münhasır olmak cihetiyle bunların vakt ü zamanıyla ve yoluyla icrâsı kābil olamayıp sinîn-i vefîreden berü tedâhülde kalmış elde bir çok i‘lâmât olduğundan bu teehhurâtın def‘i ve hukūk-ı âmmenin teshîl-i istifâsı’çün her mahkemeden sâdır olan ve kendisine ta‘alluk eyleyen i‘lâmâtın ol mahkeme tarafından icrâsı kā‘idesi te’sîs eylemeye maslahaten dahi ihtiyâc-ı âcil [26] göründüğünden kā‘ide-i mezkûre tahsîsâtınca derdest olan ba‘zı tahkīkātın ikmâlinden sonra taşralara dahi ta‘mîm olunmak üzere bunun şimdiden Dersa‘âdetçe mevki‘-i icrâya konulması ve bir de lâyiha-i mezkûre ahkâmından ve tabî‘at-ı maslahat iktizâsından olduğu üzere her mahkeme reisinin icrâ-yı i‘lâmâta müte‘allik husûsâtdan dolayı devâir-i resmiye ve vilâyât ile mükâtebeye me’zûn olması bi’l-istibdâl ol vechile icrâ-yı iktizâlarına irâde-i seniyye-i cenâb-ı pâdişâhî müte‘allik buyurulmuş ve dâire-i adliyece mukteziyâtı bi’l-icrâ sûret-i hâl sâir lâzım gelen mahallere bildirilmiş olmağla ba‘demâ Dersa‘âdet mehâkim-i husûsiyeti riyâsetleri ve mahkeme-i ticâret riyâset-i ûlâsı tarafından savb-ı sâmî-yi cenâb-ı Meşîhat-penâhîleriyle kā‘ide-i muharrere dâhilinde infâz-ı i‘lâmâta müte‘allik muhâbere vukū‘unda îcâbâtının icrâsına himem-i celîle-i Meşîhat-penâhîleri derkâr buyurulmak bâbında emr ü fermân hazret-i men-lehu’l-emrindir. Fî-gurreti Cemâziyelâhire sene [1]296 ve fî 10 Mayıs sene [1]295. Said