İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 187 Hüküm no: 185 Orijinal metin no: [30-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hayır işleri için vasiyet edilmiş olan paraların, ibtidai mektep inşa ve ıslahı için harcanması yolunda hayır sahiplerinin yönlendirilmesi İstanbul Kādılığı’na Fazîletlü efendim hazretleri, Vücûh-ı birre sarf olunmak üzere erbâb-ı hayrât tarafından terk ve teberru‘ olunan nukūd ve emvâlin ba‘demâ mekâtib-i ibtidâiyenin inşâ ve ıslâhına sarf olunması îcâb-ı vakt ve hâle daha evfak olacağından bahisle şimdiye kadar mehâkim-i şer‘iye huzûrunda miras için vasiyet eylediği ta‘ayyün eden nukūd vesâirenin beyân-ı mikdâr ve keyfiyeti ve bundan böyle dahi vesâyâ vukū‘unda ashâb-ı vasiyetin bu yola imâle ve tergībinin îcâb edenlere tenbîhi zımnında keyfiyetin taraf-ı senâverîye teblîğ ve iş‘ârı ifâdesini hâvî Ma‘ârif Nezâret-i behiyesinden meb‘ûs tezkirenin leffiyle tesyîr buyrulan tezkire-i sâmiye meclis-i tedkīkāt-ı şer‘iyeye lede’l-havâle vücûh-ı birre sarf olunmak üzere ba‘demâ ashâb-ı hayrât tarafından vesâyâ vukū‘unda ber-mûceb-i iş‘âr vasiyet edenlere teşvîkāt-ı lâyıka icrâsı vücûh-ı birre vasiyet edilmiş nakid ve emvâl var ise mu‘ayyenâtdan mâ‘adâsı hakkında dahi ves[â]yâya tergībât îfâsıyla fazla-i mezkûrenin mikdâr ve kemmiyetin beyân ve ibnâ olunması husûslarının sûy-ı fâzılânelerine teblîği ifâde olunmuş olmağla taraf-ı fâzılânelerinden dahi îcâb-ı keyfiyetin sür‘at-i îfâ ve mülhakāta dahi teblîğ ve inbâsıyla netîce-i hâlin beyân ve ifâde buyurulması siyâkında tezkire-i senâverî terkīm kılındı. Fî 26 Zilka‘de sene [1]296 ve fî 30 Teşrîn-i evvel sene [12]95.