İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 188 Hüküm no: 186 Orijinal metin no: [30-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Memurların cemaatle kıldıkları namazdan sonra devlet ve milletin selameti için dua etmeleri ve ulema kılıklı kişilerin kendilerine yakışmayacak yerlerde bulunmamaları İstanbul Kādılığı’na Velî-ni‘met-i bî-minnetimiz pâdişâh-ı deyyân-şi‘âr efendimiz hazretlerinin kātıbe-i efkâr-ı hayret-disâr-ı mülûkâneleri Devlet-i aliyyelerinin sa‘âdet ve selâmeti kazıyyesi olup bu bâbda esbâb-ı zâhireye mürâca‘at elzem olduğu gibi câlib-i muvaffakıyet ve nusret-i gaybe-i İlâhiye olacak vesâil-i mukaviyeye tevessül dahi ehem olmasına ve bu cümleden olarak kâffe-i Müslimîn ve be-tahsîs me’mûrîn-i saltanat-ı seniyyenin emr-i ta‘bede salâbet ve ikdâmları mültezem-i âlî bulunmasına binâen sâir gûne istimdâdât-ı mukavviyeye teşebbüs sırasında devâir-i resmiyece dahi vakt-i salât duhûlünde me’mûrîn cemâ‘ate hazır olarak akīb-ı salâtda muvaffakıyyât-ı seniyye-i hazret-i pâdişâhî ve selâmet-i âmme için dergâh-ı Hüdâ-yı bî-enbâza arz-ı muhabbet ve niyâz olunması ziyy-i ulemâda bulunan dâ‘iyân ve ketebe vesâirenin kahvehânelerde ve mazınna-i töhmet olan mahallerde oturmamak ve husûsan sıfât-ı ilmiyelerine yakışmayacak [31] hâlât ve ta‘biyât ile iştigāl etmemek üzere îcâb edenlere tenbîhât-ı ekîde icrâsıyla mütecâsirlerinin kaviyyen men‘ ve zecri muktezâ-yı emr ü fermân-ı kerâmet-nişân-ı cenâb-ı hilâfet-penâhîden bulunmuş ve şıkk-ı ahîr hakkında Zabtiye Nezâret-i behiyesine de teblîgāt-ı lâzıme icrâ kılınmış idiğinden dâire-i aliyyelerinde dahi ol vechile îfâ-yı farîzaya devam ve muvâzabet ve lâzım gelenlere tenbîhât-ı şedîde icrâsına mübâderet buyurulması siyâkında tezkire-i senâverî terkīm kılındı. Fî 9 Muharrem sene [1]297 ve fî 11 Kânûn-ı evvel sene [1]295.