İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 189 Hüküm no: 187 Orijinal metin no: [31-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Evrak üzerine kanuna uygun miktarda pul yapıştırılması, daha aşağı miktarda olanlardan ceza alınması Damga Nizâmnâmesi’nin on ikinci maddesinde evrâk-ı sahîha-i nisbiyeye yazılmayan poliçe ve her türlü bono ve emr-i tahvîlleri ve emânet senedleri vesâir evrâk-ı ticâriye üzerine evrâk-ı sahîha nisbetinde resmi hâvî damga pulu yapışdırılacağı muharrer ve mastûr olduğu hâlde ekser evrâk-ı âdiye üzerine yazılan senedât vesâireye yapışdırılan pullarda derecât-ı nizâmiyesinin gözedilmediği ya‘ni yazılan sened meselâ yüz on bin guruşluğu hâvî ise buna yetmiş beş guruşluk pul yapışdırılmak lâzım gelir iken binde yirmi para nisbetinde olarak yalnız elli beş guruşluk pul yapışdırılmağla iktifâ olunduğu haber verilmiş ve bu ise hükm-i nizâma münâfî ve evrâk-ı sahîha vâridâtının telef ve ziyâ‘ını müeddî olarak gayr-ı câiz bulunmuş idiğine ve mezkûr nizâmnâmesinin yirmi sekizinci maddesinde derece-i nizâmiyesinden dûn varakaya yazılmış veyâhûd nisbetinden eksik pul yapışdırılmış olan senedâtın noksanı ne mikdâr ise ikmâl ettirildikden sonra cezâ-yı nakdîsi yalnız noksanı üzerine alınacağı ve yirmi ikinci maddesinde dahi mehâkim ve mecâlis reis ve a‘zâlarından vesâir hükûmet me’mûrlarından her kim olur ise olsun işbu nizâmnâme hükmünce alınması lâzım gelen resm ve cezâ-yı nakdîyi taleb ve istifâ emrinde vazîfesini îfâ etmez ise nizâmen alınması lâzım gelen cezâ-yı nakdînin üç misli kendisinden istifâ olunacağı murakkam ve mezkûr olup böyle nisbet-i nizâmiyesinden dûn pul yapışdırılmış olan senedât vesâirenin temyîziyle îcâb-ı nizâmîsinin bi’l-icrâ hukūk-ı hazînenin vikāyesi mehâkim ve mecâlis reis ve a‘zâlarının dikkatlerine vâbeste bulunduğuna mebnî havâle ve icrâ me’mûrları taraflarından bu bâbda bir kat daha dikkatle o makūle noksan pul yapışdırılmış evrâk ele geçirildiği hâlde hükm-i nizâmın icrâsı Rüsûmât Emânet-i celîlesinden bâ-tezkire vukū‘ bulan iş‘âr üzerine bi’l-cümle devâir ve vilâyâta bildirilmiş olmağla Bâb-ı Vâlâ-yı Fetvâ-penâhîlerince de ber-minvâl-i muharrer îcâbının icrâsına himem-i aliyye-i Meşîhat-penâhîleri derkâr buyurulmak bâbında emr ü irâde hazret-i men-lehu’l-emrindir. Fî 10 Muharrem sene [1]297 ve fî 12 Kânûn-ı evvel sene [12]95.