İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 189 Hüküm no: 188 Orijinal metin no: [31-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İlamlarda adı geçen paraların cinsi ile borçlanma tarihlerinin muhakkak yer almasına dikkat edilmesi İstanbul Kādılığı’na Fazîletlü efendim hazretleri, İ‘lâmât-ı şer‘iyenin ekserinde mebâliğ-i mahkûmun-bihânın cins ve nev‘i ve müdâyene târihleri ta‘ayyün ve tasrîh olunmamasından dolayı tahaddüs eden münâza‘ât ve müşkilâtdan bahisle ol bâbda ba‘zı ifâdeye dâir i‘lâmât-ı şer‘iye İcrâ Me’mûriyeti’nden meb‘ûs tezkire Meclis-i Tedkīkāt-ı Şer‘iyye’ye lede’l-havâle inde’l-mürâfa‘a iddi‘â olunan akçe cins ve aded üzerine olmayıp da guruş olduğu sûretde buna bir cins ta‘yîn ve fî-i râyicin dahi beraberce tasrîhi hakkında vârid olan düstûrda dahi münderic bulunan fî-gurreti Cemâziyelevvel sene [12]89 târihli tezkire-i sâmiye üzerine hükkâm-ı şer‘-i şerîfe ta‘mîmen icrâ olunan vesâyâ ve tenbîhâtın te’kîdi zımnında taraf-ı senâverîden muharrerât-ı umûmiye tastîr ve her nevi‘ ukūd ve müdâyenâtın inde’l-mürâfa‘a târihlerinin tahkīk ve zabtıyla i‘lâmât-ı şer‘iyeye derc ve tahrîri husûsunun da ilâve ve tezbîr edilmesi ifâde olunarak bu vechile Dersa‘âdet mehâkim-i şer‘iyesiyle merâkiz-i vilâyât ve elviye-i müstakille niyâbet-i şer‘iyelerine te’kîden vesâyâ-yı lâzıme îfâ kılınmış [32] olmağla taraf-ı fâzılânelerinden dahi ber-minvâl-i muharrer îfâ-yı mu‘âmeleye ve bu bâbda müsâmaha ve dikkatsizlik vukū‘a getirilmemesine himmet ve mehâkim-i merbûtâya teblîğ-i keyfiyet buyurulması siyâkında tezkire-i hulûsverî terkīm olundu. Fî 22 Ra sene [12]97 ve fî 21 Şubat sene [12]95. Ahmed Said