İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 202 Hüküm no: 203 Orijinal metin no: [44-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dürziler arasındaki arazi, vasiyet ve veraset davalarına bundan böyle şer‘î kanun, nizam ve hükümlerine göre bakılacağı Taraf-ı vâlâ-yı Meşîhat-penâhîye Başvekâlet Dâiresi Mektûbî Kalemi Aded 51 Reşâyâ kazâsında mutavattın tâife-i Dürûz beyninde vasiyet maddesine dâir tekevvün eden mesâlih ve de‘âvî tâife-i merkūmeden Şeyh Zaki ma‘rifetiyle rü’yet olunmakda olduğu hâlde kazâ-i mezkûr niyâbet-i şer‘iyesinden terekeleri umûruna müdâhale olunmak istenildiğinden vasiyet maddesinin kadîmî vechile mer‘iyyü’l-icrâ tutulup müdâhale edilmemesi Dürziler tarafından taleb olunduğu ve cereyân eden vasiyetler üzerine taksîm ve tasarruf edilmiş olan emlâk ve arâzîden Reşâyâ ve Hasbeyâ kazâlarıyla ale’l-umûm Cebel-i Dürûz’da ve Cebel-i Lübnan’da milel ve teba‘a-i sâireden ba‘zılarına satılmış ve mürûr-ı zamanla kā‘ide-i şer‘iye ve nizâmiyeye tevfîkan eyâdî-yi âhara geçmiş şeyler bulunacağı vechile cereyân eden mu‘âmelât hükümsüz tutulmak yoluna gidilse bir çok münâza‘ât ve müşkilâta tesâdüfle içinden çıkılamayacak ahvâl zuhûr eyleyeceği mütâla‘âtına ve bu mütâla‘ât cânib-i hükûmetden mukaddemâ yedlerine verilen buyruldular ahkâmına müstenid idiği iddi‘â kılınmakda olmasına göre bu târihe kadar cereyân etmiş olan mu‘âmele hâliyle kalmak üzere bundan <> sonra tasarruf-ı emlâk ve arâzîye dâir [45] kâffe-i mu‘âmelâta ve bunlara müte‘allik vasiyet ve verâsetlere dâir zuhûr edecek münâza‘âtdan dolayı mehâkime mürâca‘at vukū‘unda usûl-i şer‘iye ve kavânîn ve nizâmât-ı mer‘iyye ahkâmına tevfîkan rü’yet ve tesviye kılınacağının i‘lânı istîzânını mutazammın Suriye vilâyet-i celîlesinden Dâhiliye Nezâret-i celîlesine meb‘ûs tahrîrât melfûfâtıyla Şûrâ-yı Devlet’e lede’l-havâle tâife-i merkūmenin fırak-ı İslâmiye’den ma‘dûdiyetiyle beraber umûr-ı ta‘biyede ve nikâh misillü mevâdd-ı şahsiyelerinde ikāmetin meslek ve mezâhibine etbâ‘ları ve onlara mürâca‘atları husûsuna usûl-i câriye-i kadîmelerinin külliyen feshi münâsib ve câiz olamayacağı gibi taksîm ve tasarruf edilmiş olan emlâk ve arâzî hakkında yeniden mu‘âmele icrâsı gayr-ı kābil olmağla beraber bir takım münâza‘ât tevellüd edeceği anlaşılmış olduğuna binâen ber-mûceb-i iş‘âr şimdiye değin cereyân eden mu‘âmeleye ilişilmemiş ve bundan böyle emlâk ve arâzîye ve vasiyet ve verâsetlere müte‘allik zuhûr edecek münâza‘âtdan dolayı mehâkime mürâca‘at vukū‘unda usûl-i şer‘iye ve nizâmiye dâiresinde tesviye kılınacağının i‘lânıyla mu‘âmelâtın o yolda cereyân ettirilmesi zımnında vilâyet-i müşârün-ileyhâya me’zûniyet i‘tâsı husûsunun Dâhiliye Nezâret-i celîlesine havâlesi taraf-ı vâlâ-yı Meşîhat-penâhîleriyle Vergi Emâneti’ne ma‘lûmât i‘tâsı tezekkür edildiği Dâhiliye Dâiresi’nden bâ-mazbata ifâde olunarak mûcebince nezâret ve emânet-i müşârün-ileyhâya teblîğ-i keyfiyet kılınmış olmağla ol bâbda emr ü irâde hazret-i men-lehu’l-emrindir. Fî 19 Receb sene [1]299 ve fî 24 Mayıs sene [12]98. Abdurrahman