İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 204 Hüküm no: 204 Orijinal metin no: [45-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rahiplere ait emlak-ı metrûke manastıra ait olduğundan, Kudüs Rum manastırı rahiplerinden Keseryos ve Bartinos’dan kalan mallar hakkında da buna uyulması Makām-ı Meşîhat’den İstanbul Kādılığı’na Kudüs Rum manastırı rehâbîninden Keseryos ve Bartinos’un emvâl-i metrûkeleri kendülerine âid olduğuna dâir vârisleri tarafından ikāme olunan da‘vâ fî 7 Cemâziyelâhire sene [1]287 târihinde Dîvân-ı hümâyûn Kalemi’nden bir muktezâ varakasında vukū‘ bulan yanlışlıkdan ileri gelmesine ve netîce-i tedkīkāta nazaran Kudüs Rum manastırında bulunan rehâbînin münzevî takımından oldukları ber-mûceb-i şurût-ı kadîme defteri vukū‘unda her neye mâlik iseler manastıra âid olduğu hakkında Kudüs Rum Patrikliği cânibinden dermeyân olunan iddi‘ânın sıhhati rehin-i rütbe-i sübût olmasıyla Düstûr’un cild-i sâlisinde münderic buyruldunun mefsûhiyet hükmünün ta‘mîmen vilâyâta ve idâre-i müstakillede bulunan mutasarrıflıklara iş‘ârı ve keyfiyetin elsine-i muhtelife üzere neşrolunan gazeteler ile i‘lân ettirilmesi husûsunun Dâhiliye Nezâret-i celîlesine havâlesi ve mehâkim-i şer‘iye ve adliyece ona göre mu‘âmele olunmak üzere taraf-ı muhibbî ile Adliye Nezâret-i celîlesine ma‘lûmât i‘tâsı ve kuyûdâtın şurût-ı kadîmeye göre tashîhiyle ba‘de ezîn böyle yanlışlık vukū‘a getirilmemesine i‘tinâ olunmasının Dîvân-ı hümâyûn Kalemi’ne teblîği ile mûmâ-ileyhimâ Keseryos ve Bartinos veresesi iddi‘âlarının tedkīk ve temyîzi mürâfa‘aya menût bulunduğuna binâen âid olduğu mahkemeye havâlesi ve Selanik’de vefât eden râhib Oramyos’un emvâl ve emlâk-i metrûkesi hakkındaki da‘vâ için âid olduğu mahkemeye mürâca‘at olunması lâzım geleceğinin dahi patrikhâneye teblîği husûslarının başka Adliye Nezâret-i celîlesine bildirilmesi vukū‘ bulan mürâca‘at ve iş‘ârât üzerine Şûrâ-yı Devlet Dâhiliye Dâiresi’nde bi’t-tezekkür mûcebince nezâret-i müşârün-ileyhimâ ile Dîvân-ı hümâyûna teblîğ-i keyfiyet kılınmış olduğundan bastla bâb-ı fetvâcada dahi ona göre mu‘âmele-i <> lâzımenin îfâsı bâ-tezkire-i sâmiye-i vekâlet-penâhî izbâr buyrularak îcâbı îfâ ve Dersa‘âdet hükkâm-ı kirâmına ve bi’l-cümle merâkiz-i vilâyât ile elviye-i müstakille nüvvâbına teblîgāt-ı mukteziye icrâ kılınmış olmağla taraf-ı fâzılânelerinden dahi rehâbîn-i mezkûre terekâtı hakkında ol vechile mu‘âmeleye himmet ve mülhakāta dahi beyân-ı hâle mübâderet buyurulması siyâkında tezkire-i senâverî terkīmine ibtidâr olundu. Fî 27 Zilhicce sene [1]299 ve fî 18 Teşrîn-i evvel sene [12]98.