İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 205 Hüküm no: 205 Orijinal metin no: [45-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Senetler ile evlenecek olan bekar ve dul izinnamelerine pul yapıştırılması Fazîletlü efendim hazretleri, Bu kerre bâ-irâde-i seniyye mevki‘-i icrâya konulan Resm-i Damga Kānûnu mûcebince ba‘demâ kâffe-i senedât-ı sâirenin yazılacağı evrâk üzerine nisbet-i nizâmiyesine tevfîkan damga pulu yapışdırılacağı gibi bâkir ve seyyib izinnâmelerine dahi rüsûm-ı maktû‘a ta‘rîfesinde gösterildiği vechile [46] onar guruşluk damga pulu yapışdırılmak lâzım geleceğinden ba‘demâ verilecek izinnâmelere idârelerden ber-mûceb-i nizâm onar guruşluk pul mübâya‘asıyla yapıştırılmasının lâzım gelenlere teblîği Rüsûm-ı Sitte Nezâret-i Umûmiyesi’nden iş‘âr olunarak Dersa‘âdet hükkâm-ı kirâmıyla bi’l-umûm merâkiz-i vilâyât ve elviye-i müstakille nüvvâbına icrâ-yı vesâyâ edilmiş olmağla ba‘de ezîn taraf-ı fazîletlerinden dahi ber-mûceb-i kānûn îfâ-yı mu‘âmeleye himmet ve îcâb edenlere teblîğ-i keyfiyet buyurulması siyâkında tezkire-i senâverî terkīm olundu. Fî 18 Rebî‘ülevvel sene 1300, fî 16 Kânûn-ı sânî sene 1298. Ahmed Esad