Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 550 Hüküm no: 669 Orijinal metin no: [116b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Hamdi Efendi b. Ahmed’in menzilini Mehmed Paşa Vakfı’na bey‘ bi’l-istiğlâl yoluyla sattığı İstiğlâl hüccetidir. Havâss-ı Aliyye kazâsı müzâfâtından Kasaba-i Südlüce’de Kasûnîzâde mahallesinde sâkin Mehmed Hamdi Efendi [b.] el-merhûm Ahmed Efendi meclis-i şer‘-i şerîf-i enverde mahmiye-i İstanbul’da Manisalı Çelebi mahallesi avârızı için merhûm Mehmed Paşa vakf eylediği nukūd-ı mevkūfesinin bi’l-fi‘l mütevellîsi olan bâ‘isü’l-kitâb Mehmed Ağa b. el-Hâc Mehmed mahzarında bi tav‘ihî ikrâr-ı tâm ve takrîr-i kelâm edip silk-i mülkümde münselik olup mezbûr Kasûnîzâde mahallesinde vâki‘ bir tarafdan mescid-i şerîf cidârı ve bir tarafdan Abdüsselâm vakfı olan bahçe ve bir tarafdan Keresteci tekyesi ve bir tarafdan tarîk-i âm ile mahdûd olup dâhiliyye ve hâriciyyesi büyût-ı adîde ve bi’r-i mâ ve kenîf ve eşcâr-ı müsmire ve gayr-ı müsmireyi müştemil mülk menzilimi cümle tevâbi‘ ve levâhıkı ve kâffe-i menâfi‘ ve merâfıkı ile mütevellî-i mûmâ-ileyh Mehmed Ağa’ya üç yüz esedî guruşa bi tarîki’l-istiğlâl bey‘ ve teslîm ol dahi mütevellîsi olduğu mâl-ı vakf-ı mezbûr ile iştirâ ve kabz ve kabûl eylediğinden sonra semeni olan meblağ-ı mezbûr üç yüz esedî guruşu yedinden tamâmen ahz u kabz eyledim mütevellî-i mûmâ-ileyh menzil-i mahdûd-ı mezkûru ba‘de’t-tahliyyeti’ş-şer‘iyye ve’t-tekābuzi’l-mer‘î târih-i kitâbdan bir sene tamâmına değin kırk beş esedî guruşa bana îcâr ve teslîm ben dahi ber vech-i muharrer istîcâr ve kabûl ve tesellüm eyledim eğer müddet-i mezbûr tamâmında asl-ı mâl-ı mezkûr üç yüz guruş ile ücret-i merkūme kırk beş guruş ki cem‘an üç yüz kırk beş guruşu mütevellî-i mûmâ-ileyhe edâ ve teslîm etmezsem, menzil-i mahdûd-ı mezkûru sûk-ı sultânîde semen-i misli ile âhara bey‘ ve kabz-ı semen ve semeninden vakf-ı mezbûra deynimiz olan meblağ-ı mezbûru ahz u kabz ve fazla kalırsa bana îsâle ve bunlar mütevakkıf olduğu umûrun küllîsine küllemâ azeltüke fe-ente vekîli mantûku üzre azl ve in‘izâlden masûne vekâlet-i devriyye ile tarafımdan yine mütevellî-i mûmâ-ileyh Mehmed Ağa’yı vekîl ve nâib-i menâb nasb ve ta‘yîn edip ol dahi vekâlet-i mezbûreyi kabûl eyledi dedikde gıbbe’t-tasdîki’ş-şer‘î menzil-i mezbûrun derkine ve asl-ı mâla ve ücret-i lâzımeye Kasımpaşa’da Yeldeğirmeni mahallesinde sâkin Süleyman Ağa b. Mehmed b. Mahmud tarafeynden emr ve kabûlü hâvî kefâlet-i sahîha-i şer‘iyye ile kefîl olmağın mâ vaka‘a bi’t-taleb ketb olundu. Fi’l-yevmi’s-sâmin aşer min şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: Es-Seyyid Mehmed Çelebi b. es-Seyyid Receb Çelebi, Güngörmez mahallesi imâmı Ahmed Efendi, attâr Hüseyin Çelebi b. Abdullah, Mehmed Çelebi b. Hasan, Mustafa Efendi b. Habib, Mehmed Çelebi b. Süleyman.