İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 207 Hüküm no: 208 Orijinal metin no: [47-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bahçelerin sed ve duvarları ile mabed, kışla ve hastanelerin tamirinden vergi alınmaması Şehremâneti’nden Huzûr-ı âlî-yi cenâb-ı Meşîhat-penâhîye Ma‘rûz-ı bende-i dîrîneleridir ki, Bu kere neşr ve i‘lân kılınan Ebniye Kānûn-ı cedîdinin elli sekizinci maddesinde bağçelerin dâhili sed duvarlarıyla bi’l-cümle ma‘âbid ve mekâtib ve kışla ve hastahâneler misillü ebniye-i emîriye ve hayriye inşâ ve ta‘mîrinde resm alınmayacak ise de her hâlde meccânen bir kıt‘a ruhsat tezkiresi verileceği ve bunlara merbût emlâk ve akār hakkında eşhâs uhdesindeki emlâk ve akār mu‘âmelesi icrâ ettirilerek her nevi‘ harc ve resm ahz edileceği muharrer olmasına mebnî bu makūle ebniye-i emîriye ve hayriyenin ta‘mîr ve inşââtında mensûb olduğu belediye dâiresinden meccânen ruhsat tezkiresi istihsâli ve bu ebniyeye merbût emlâk ve akārın dahi icrâ-yı ta‘mîrâtında ber-mûceb-i kānûn dâiresine iktizâ eden harcı verilerek ruhsat tezkiresinin ahzı lâzım geleceği beyânıyla ba‘demâ madde-i mezkûre ahkâmına tevfîk mu‘âmele olunmak üzere îcâb eden me’mûrîne emr ü tenbîh buyurulmak üzere keyfiyetin arz ve izbârı Emânet Hendesehânesi’nden ifâde olunmağla ol bâbda emr ü fermân hazret-i veliyyü’l-emrindir. Fî 22 Rebî‘ülevvel sene [1]300 ve fî 20 Kânûn-ı sânî sene [12]98.