İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 208 Hüküm no: 210 Orijinal metin no: [47-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Damga Resmî Kanunu’nun ilan tarihinin bildirildiği Sadâret’den Taraf-ı sâmî-yi Fetvâ-penâhîye Ma‘rûz-ı bende-i dîrîneleridir ki, Mer‘iyyet-i ahkâmına irâde-i seniyye-i hazret-i pâdişâhî müte‘allik buyurulup sebk eden teblîgāt üzerine bi’l-cümle vilâyât ile devâire gönderilmiş olan Resm-i Damga Kānûnu’nun târih-i i‘lânında iştibâh olunup hâlbuki kānûn-ı mezkûrun neşri târihinden i‘tibâren bir sene hitâmına kadar mevcûd olan evrâk-ı sahîhanın cevâz-ı isti‘mâli ahkâm-ı kānûniye iktizâsından olmasıyla ona göre mu‘âmele-i kaydiye icrâ olunmak üzere yevm-i i‘lânın sûret-i resmiyede bilinmesine lüzûm göründüğü Dîvân-ı Muhâsebât’dan beyân olunmasına ve mezkûr kānûnnâmenin zîri Türkçe ve Fransızca olarak fî 6 S sene [1]300 ve fî 5 Kânûn-ı evvel sene [12]98 târihiyleriyle müverrah olduğu gibi yine o gün de gazetelerde neşr ve i‘lân olunduğu cihetle târih-i mezkûrun i‘lân târihi idiği derkâr bulunmasına mebnî bu bâbda bir gûne tereddüd ve iştibâha mahâl kalmamak üzere keyfiyetin ta‘mîmen devâir ve vilâyâta teblîği Mâliye Nezâret-i celîlesinden [48] bâ-tezkire ifâde olunmuş ve devâire iş‘âr-ı keyfiyet olunduğu gibi vilâyâta ve müstakil mutasarrıflıklara icrâ-yı teblîgāt olunması da Dâhiliye Nezâret-i [celîlesinden] buyurulmuş olmağla Bâb-ı Vâlâ-yı Fetvâ-penâhîlerince dahi ona göre îfâ-yı mu‘âmele-i lâzımeye himem-i aliyye-i Fetvâ-penâhîleri derkâr buyurulmak bâbında emr ü irâde hazret-i men-lehu’l-emrindir. Fî 18 Rebî‘ülevvel sene [1]300 ve fî 16 Kânûn-ı sânî [12]98.