İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 209 Hüküm no: 212 Orijinal metin no: [48-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Silah altında vefat eden askerlerin vârislerinden veraset ilâmı vergisi alınmaması Mâliye Nezâreti’nden Ma‘rûz-ı bende-i dîrîneleridir ki, Silâh altında vefat eden efrâd-ı askeriye veresesinin sübût-ı verâsetlerini hâvî olan i‘lâmât-ı şer‘iyenin damga resminden mu‘âfiyeti hakkında Resm-i Damga Nizâmnâmesi’nde sarâhat yoğise de bunlardan resm istihsâline dâir kayd ve işâret dahi bulunmadığından ve mu‘âfiyet-i mezkûrenin nizâmnâmeye tezyîline lüzûm görülemeyip te‘âmülün muhâfazası kâfî olduğundan ol vechile mu‘âmele olunması taraf-ı âcizîden vukū‘ bulan istîzân üzerine Şûrâ-yı Devlet Tanzîmât Dâiresince tezekkür kılındığı beyân-ı âlîsiyle icrâ-yı îcâbı şeref-vârid olan fî 24 Teşrîn-i sânî sene [12]98 târihli ve bin yüz yirmi dokuz numaralı tezkire-i sâmiyede irâde ve iş‘âr buyurulmuş ve mûcebince devâir-i mukteziyeye ve bi’l-cümle vilâyâta ta‘mîmen icrâ-yı teblîgāt kılınmış olmağla Bâb-ı Vâlâ-yı Meşîhat-penâhîlerince de ber-minvâl-i muharrer îfâ-yı muktezâsı zımnında lâzım gelenlere emr ü tenbîh buyurulması husûsunun huzûr-ı âlî-yi cenâb-ı Meşîhat-penâhîlerine arz ve izbârı Vâridât İdâre-i Umûmiyesi’nden ifâde kılınmağın ol bâbda emr ü <> fermân hazret-i veliyyü’l-emrindir. Fî 21 Safer sene [1]300 ve fî 21 Kânûn-ı evvel sene [12]98.