İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 211 Hüküm no: 215 Orijinal metin no: [50-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Değiştirilmek üzere toplanan meskûkâtın ilgili dairelerce pusula tanzim edilip mühürlendikten sonra Osmanlı Bankası tarafından satılması Bâbıâlî Dâire-i Sadâret-i uzmâ Devâir-i merkeziyeden vezne muhâsebeleri rü’yet olunan ba‘zı dâirelerce hasebi’l-lüzûm meskûkâtın hîn-i tebdîlinde yalnız meskûkâtı tebdîl eden sarrâf tâifesinden imzâlı bir pusula ahzıyla sened-i müsbit makāmında hıfz edilmekde olup bu sûret selâmet-i mu‘âmele emrinde te’mîn-i ezhân kifâyet edemeyeceğinden ba‘demâ dâirece az çok tebdîl <> edilecek akçenin hazînece müttehaz olan usûle tevfîkan mikdârını mübeyyin kalemlerce birer pusula tanzîm ve muhâsebeciler tarafından tahtîm edilip nezâret müsteşârı ve müsteşârı olmayan dâirelerde dahi o dâirenin en büyük me’mûru tarafından tasdîk olundukdan sonra piyasaya tevfîkan Bank-ı Osmânî ma‘rifetiyle satılması Dîvân-ı Muhâsebât Riyâset-i behiyesinden bâ-tezkire vukū‘ bulan iş‘âr üzerine bi’t-tensîb devâire bildirilmiş olmağla Bâb-ı Vâlâ-yı Fetvâ-penâhîlerince dahi ona göre îfâ-yı mu‘âmele buyurulması bâbında emr ü irâde hazret-i men-lehu’l-emrindir. Fî 27 Safer sene 1300 ve fî 27 Kânûn-ı evvel sene [12]98.