İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 217 Hüküm no: 219 Orijinal metin no: [57-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vasî nasbı, tekaüd ve cinayet gibi hususlar için yapılacak tıbbi muayene ve tahlillerin sadece daire nazırları ve en büyük memurları tarafından istenmesi Makām-ı Sadâret’den Taraf-ı vâlâ-yı Fetvâ-penâhîye Ma‘rûz-ı bende-i dîrîneleridir ki, Vasî nasbı ve tekā‘üd ve cinâyâtdan mütevellid husûsât için mu‘âyene ve tahlîlât-ı mühimme icrâ ve etibbâ tarafından verilmiş olan raportlar Cem‘iyet-i Tıbbiye-i Mülkiyece tedkīk edilmekde ise de ve hamiyet ve mesûliyeti derkâr olan bu misillü maddelerin mine’l-kadîm devâir-i resmiye nüzzâr-ı kirâmı ve en büyük me’mûrları cânibinden resmen vukū‘ bulan iş‘âr üzerine yapılması usûl-i kadîmeden olduğu hâlde bir müddetden berü ekser nezâret ve devâirce bulunan şu‘belerden ve vilâyât müdde‘î-i umûmîleri var iken mu‘âvinlerinden tezâkir ve mekâtib ve ilmühaberlerle mu‘âyene ve tahlîl emsâli resmî ve mühim işlerle havâle ve istifsâr edilmekde bulunduğundan bu makūle şeyler hakkında kangı me’mûr ve me’mûriyetlerden vürûd edecek iş‘ârın kabûlü îcâb edeceği istifsârını hâvî Tıbbiye Nezâreti’nden Dâhiliye Nezâret-i celîlesine meb‘ûs tezkire Şûrâ-yı Devlet’e lede’l-havâle bu makūle husûsâtda her me’mûrun resmî mu‘âyene ve emsâlini taleb eylemesi mahâzîr ve teşvîşi mûcib olacağından devâirce suâl olunacak [58] mevâddın devâir nüzzâr ve en büyük me’mûrîn-i resmiyesi ve lede’l-hâce müdde‘î-i umûmîler taraflarından istifsâr kılınmasının bi’l-cümle devâir ve vilâyâta teblîğiyle nezâret-i müşârün-ileyhâya beyân-ı hâl olunması tezekkür kılındığı Dâhiliye Dâiresi’nden bâ-mazbata ifâde olunmuş ve devâire iş‘âr-ı keyfiyet olunduğu gibi vilâyâta dahi teblîğ-i karâr ile nezâret-i müşârün-ileyhâya ma‘lûmât i‘tâsı Dâhiliye Nezâret-i celîlesine bildirilmiş olmağla Bâb-ı Vâlâ-yı Fetvâ-penâhîlerince dahi ona göre îfâ-yı mu‘âmele-i lâzımeye himem-i aliyye-i Fetvâ-penâhîleri şâyân buyurulmak bâbında emr ü irâde hazret-i men-lehu’l-emrindir. Fî 8 Şevval sene 1300 ve fî 30 Temmuz sene [12]99.