İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 218 Hüküm no: 221 Orijinal metin no: [58-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstimlak Kanunu’na yapılan zeyli ihtiva eden matbu bir nüshanın gönderildiği Sadâret’den Taraf-ı vâlâ-yı Fetvâ-penâhîye Ma‘rûz-ı bende-i dîrîneleridir ki, Menâfi‘-i umûmiye için İstimlâk Kānûnu’na zeylen komisyon-ı mahsûsunca kaleme alınıp Meclis-i Mahsûs-ı Vükelâ karârıyla bi’l-istîzân mer‘iyyetine irâde-i seniyye-i cenâb-ı pâdişâhî müte‘allik buyurulmuş ve evrâk-ı havâdis ile i‘lân ettirilmiş olan fırka-i kānûniyenin nüsah-ı matbû‘asından devâir-i sâireye gönderildiği gibi bir nüshası dahi leffen irsâl kılınmış olmağla ol bâbda emr ü irâde hazret-i men-lehu’l-emrindir. Fî 3 Cemâziyelâhire sene 1300 ve fî 30 Mart sene [12]99. Fıkra-i nizâmiye sûretidir İşbu kānûnun ikinci faslında münderic mu‘âmelât-ı evveliye icrâ olundukda sahib-i mülk ta‘yîn olunan kısmete râzı olmazsa kıymet-i muhammene ihtiyâten yüzde yirmi fazla ile bankaya veyâ kānûnen ta‘yîn olunan mahalle teslîm olundukdan ve ol bâbda alınan makbûz senedi hükûmet-i icrâiyeye i‘tâ kılındıkdan sonra alınması lâzım gelen mülk cânib-i hükûmetden müşteri olan tarafa teslîm ettirilir. Şu kadar ki işbu mu‘âmele tarzının zikrolunan kānûn ile hâiz olduğu sâir hukūkuna kat‘an halel vermeyecekdir. İrâde-i seniyye târihi fî 17 Muharrem sene 1300 ve fî 13 Teşrîn-i sânî sene [12]99.