İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 219 Hüküm no: 222 Orijinal metin no: [59-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Terekeden alacağı olanların terekeye haciz koydurmadan alacakları için terekeyi tahrir eden mahkemeye başvurmaları Makām-ı meşîhat’den İstanbul Kādılığı’na Fazîletlü efendim hazretleri, Taraf-ı şer‘den tahrîr olunan terekâtın sür‘at-i tesviyesi lâzımeden ve nihâyet üç mâh zarfında arkası alınması dahi nizâmı iktizâsından bulunduğu gibi terekede alacağı olanların tahrîr-i tereke eden mahkeme-i şer‘iyeye mürâca‘at etmeleri lâzım gelirken alacaklıların ba‘zısı sekvestro ile terekeyi taht-ı hacze aldırıp bir hayli zaman dahi mürâca‘at etmeyerek sinîn-i vefîre tesviyesine mâni‘ olmakda idiklerinden ve eytâm ile terekede sâir alacağı bulunanlar bu yüzden dûçâr-ı sefâlet ve mağdûriyet olduklarından ve ifâdât-ı sâireden bahisle terekeden alacak iddi‘â edenlerin doğruca tahrîr-i tereke eden mahkemeye bi’l-mürâca‘a ber-nehc-i şer‘î istifâ-yı matlûb eylemek üzere terekeyi taht-ı hacze aldırılmaya müsâ‘ade olunmaması lüzûmuna dâir Meclis-i İdâre-i Emvâl-i Eytâm’dan tanzîm ve i‘tâ kılınan müzekkerenin leffiyle îfâ-yı muktezâsı hakkında makām-ı sâmî-yi Sadâret-penâhîye tastîr edilen tezkire-i senâverî üzerine Adliye Nezâret-i celîlesiyle bi’l-muhâbere terekenin mehâkim-i şer‘iye cânibinden tahrîr ve zabtı terekenin hacz-i umûmî tahtında bulundurulması demek olup bununla ashâb-ı matlûbun hukūkunu te’mîn edilmiş olacağından ba‘de ezîn terekeden alacağı olanların evvel-emirde terekeyi zabt ve tahrîr eden mahkeme-i şer‘iyede matlûblarını taleb etmeleri ve da‘vâya mecbûriyeti olduğu hâlde âid olduğu mahkemeye mürâca‘atla ikāme-i da‘vâ etmeleri lâzım geldiğinden terekelere âid emvâl ve nukūdun haczine dâir istid‘âların kabûl olunmaması husûsu Dersa‘âdet ve taşra Adliye Müfettişlikleri’ne ta‘mîmen bildirildiğini müş‘ir cevâben gönderilen tezkirenin talebiyle zeylen meb‘ûs cevâb-ı sâmî melfûfuyla meclis-i mezkûra lede’t-teblîğ keyfiyetin ma‘lûmât olmak üzere Dersa‘âdet ve bilâd-ı selâse me’mûrîn-i şer‘iyesiyle merâkiz-i vilâyât ve elviye-i müstakille niyâbet-i şer‘iyelerine iş‘ârı ifâde olunarak ol vechile îcâbı icrâ kılınmış olmağla ol bâbda Dersa‘âdet nâiblerine de i‘tâ-yı ma‘lûmât buyurulması siyâkında tezkire-i senâverî terkīmine ibtidâr olundu. Fî 14 Rebî‘ülevvel sene [1]301 ve fî 30 Kânûn-ı sânî sene [12]99. Ahmet Said