İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 221 Hüküm no: 224 Orijinal metin no: [60-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Telgraf ve posta makbuzu senetlerine damga pulu yapıştırılmasına gerek olmadığı Mâliye Nezâreti’nden Ma‘rûz-ı bende-i dîrîneleridir ki, Resm-i Damga Kānûnu hükmünce telgraf ve posta makbûzu senedlerine on paralık pul yapışdırılması lâzım gelir ise de bu sûretin icrâsında ba‘zı mehâzîr görüldüğünden bahisle istîzânı mutazammın Telgraf ve Posta Nezâreti’nden ve telgraf ve postahânelerden verilecek makbûz senedlerine yapışdırılması lâzım gelen on paralık pulun devâir-i resmiyeye müte‘allik hâsılât vesâire için verilen makbûz senedâtına şümûlü olup olmadığı istifsârına dâir Düyûn-ı Umûmiye İdâresi’nden meb‘ûs tezkire üzerine Şûrâ-yı Devlet Dâhiliye Dâiresi’nden evvel ve âhar tanzîm ve i‘tâ olunup taraf-ı sâmî-yi cenâb-ı Sadâret-penâhîlerinden bâ-tezkire-i sâmiye tevzî‘ buyrulan ve sûretleri irsâl kılınan üç kıt‘a mazbata ve tezkire meâllerinden müstebân olduğu üzere nezâret-i müşârün-ileyhânın mütâla‘asını tervîcen senedât-ı merkūmenin hükm-i nizâmdan istisnâsı lüzûmu gösterilmiş ise de mezkûr makbûz senedleri evvelce resm-i maktû‘a tâbi‘ evrâk meyânına idhâl ve kānûn-ı mebhûsün-anhın ta‘dîlât-ı ahîresinde dahi îfâ edilmiş olduğu cihetle şimdi onların istisnâsı cihetine gidilse Düyûn-ı Umûmiye İdâresi’nin i‘tirâzât ve şikâyâta kalkışması melhûz olmasına ve zâten telgraf ve postahânelerden makbûz ilmühaberleri i‘tâsı mecbûrî olmayıp ashâbının taleb ve ihtiyârına menût ve ba‘zı memâlik-i ecnebiyece ashâbının talebi üzerine posta ve telgrafhânelerden verilen o makūle makbûz senedâtı için resm alındığı muhakkak olmağla beraber mezkûr pulun kıymet-i mu‘ayyenesi dahi cüz’iyâtdan bulunmasına nazaran hükm-i kānûnun istikmâl-i vesâil-i mer‘iyeti ve posta ve telgrafhânelerden devâir-i resmiye nâmına alınıp verilecek o makūle senedât bahsine gelince bu usûl hükûmete müte‘allik muhâberât vesâir mu‘âmelâtın te’mîn-i hüsn-i cereyânı maksadına mübtenî ve yalnız telgraf ve posta idârelerine de mahsûs olmayıp bi’l-umûm devâir beyninde mine’l-kadîm cârî olduğundan ...? müte‘allik mevâdda tatbîk edilemeyeceği cihetle senedât-ı merkūmenin istisnâsı umûr-ı tabi‘iyeden bulunduğunun Posta ve Telgraf Nezâret-i behiyesine ve savb-ı âcizîye teblîği emr ü irâde buyrulduğu ve keyfiyet nezâret-i müşârün-ileyhâya bildirildiği Dâhiliye Nezâret-i celîlesinden vârid olan fî 19 Eylül sene [12]99 târih ve dört yüz elli dokuz numaralı tezkire-i aliyyede beyân ve iş‘âr buyurulmuş olduğundan mûcebince keyfiyetin bi’l-umûm devâir ile vilâyâta ve elviye-i müstakille mutasarrıflıklarına teblîği Vâridât İdâre-i Umûmiyesi’nden ifâde ve ol vechile mahâll-i sâireye teblîği-i madde kılınmağın Bâb-ı Vâlâ-yı Meşîhat-penâhîlerince de icrâ-yı îcâbının iktizâ edenlere emr ü tenbîh buyurulması bâbında emr ü fermân hazret-i veliyyü’l-emrindir. Fî 3 Muharrem sene 1301 ve fî 22 Teşrîn-i evvel sene [12]99.