İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 222 Hüküm no: 225 Orijinal metin no: [60-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Suriye’de kalpazanlar tarafından Osmanlı lirası basılarak dağıtıldığından gerekli önlemlerin alınması Mâliye Nezâreti’nden Ma‘rûz-ı bende-i dîrîneleridir ki, Beyrut’da bu kere muntazam makine ve i‘mâl ettikleri Osmanlı liraları ile bir kalpazan kumpanyası tutulmuş ve yaptıkları altın fark olunmaz bir derecede olup beher altın on beş guruşluk gümüş izâkasıyla ayârının tezyîlinden başka bir şey ile temyîz olunamayacak derecede san‘atlı yapılmış olduğu ve şimdiye kadar bu kalb altınlardan Dersa‘âdet ve memâlik-i sâireye bir hayli şey gönderilmiş olması muhtemel bulunduğu beyânıyla bu bâbda lâzım gelen mahallere ihtârât-ı mukteziyenin icrâsı ifâdesine dâir Suriye Vilâyet-i celîlesinden mevrûd fî 22 Teşrîn-i sânî sene [12]99 târihli telgrafnâme ve Vâridât İdâre-i Umûmiyesi’nden vukū‘ bulan ifâde üzerine keyfiyet bi’l-umûm devâir ile vilâyâta ve elviye-i müstakille mutasarrıflarına bildirilmiş olmağla bu bâbda Bâb-ı Vâlâ-yı Meşîhat-penâhîlerince de takayyüdât-ı lâzıme icrâsına be-gāyet ihtimâm olunmasının îcâb edenlere emr ü tenbîh buyurulması bâbında emr ü fermân hazret-i veliyyü’l-emrindir. Fî 9 Safer sene 1301 ve fî 27 Teşrîn-i sânî sene [12]99.