İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 222 Hüküm no: 226 Orijinal metin no: [61-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dersaadet ve bazı vilayetlerde nikah izinlerinden harç alınması Mâliye Nezâreti’nden Ma‘rûz-ı bende-i dîrîneleridir ki, Dersa‘âdet ve bilâd-ı selâse ile ba‘zı vilâyâtda münâkehât için cânib-i şer‘-i şerîfden verilen izinnnâmelerden Resm-i Damga Kānûnu mûcebince onar guruş taleb olunmakda idiği tezkire-i aliyye-i cenâb-ı Fetvâ-penâhîlerinden müstefâd olarak ol bâbda Şûrâ-yı Devlet Tanzîmât Dâiresi’nden kaleme alınan mazbatanın bir fırkasında beyân olunduğu üzere fi’l-hakīka kānûn-ı mezkûrda izinnâmelerden onar guruş ahzı muharrer ise de hükkâmı tavzîf edilmeyen mahallerde sarf edilecek izinnâmeler için yalnız bir guruş harc-ı varaka ahzıyla kusûru mehâkim-i şer‘îye bırakılmış ve buna mefsûh rüsûm-ı sitte ile Düyûn-ı Umûmîye İdâresince de bu âna kadar muvâfakat edilerek te‘âmül hükmüne girmiş olmasına ve esbâb-ı sâireye binâen te‘âmül-i mezkûrun devamına ilişilmemesi ve silâh altında vefât eden efrâd-ı askeriye veresesinin sübût-ı verâsetlerini hâvî i‘lâmât-ı şer‘iyenin âdî varakaya tahrîri hakkında verilen karâr-ı sâbıkın muhâfazası lüzûmu müsellem idiği beyân-ı âlîsiyle hazînece de ber-mûceb-i karâr mu‘âmele-i mukteziyenin îfâsı şeref-vârid olan fî 26 Şubat sene [12]99 târihli ve bin yüz seksen bir numaralı tezkire-i sâmiye-i cenâb-ı Fetvâ-penâhîde emr ü iş‘âr buyurulmuş ve ber-mantûk-ı irâde-i aliyye îfâ-yı muktezâsı Düyûn-ı Umûmiye Meclis-i İdâresi Komiserliği’ne ve bi’l-cümle vilâyât ve müstakillen idârede bulunan mutasarrıflıklara ta‘mîmen teblîğ edilmiş olmağın ol vechile îfâ-yı muktezâsının îcâb edenlere emr ü irâde buyurulması bâbında emr ü fermân hazret-i veliyyü’l-emrindir. Fî 4 Cemâziyelâhire sene [1]301 ve fî 19 Mart sene [1]300.