İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 223 Hüküm no: 227 Orijinal metin no: [61-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tedavülde olmayan pulları kullananlara gerekli cezaların uygulanması Mâliye Nezâreti’nden Ma‘rûz-ı bende-i dîrîneleridir ki, Tüccârdan birisi nâmına olarak Dersa‘âdet’e vürûd etmiş olan dokuz yüz on bir kap hurma için ibrâz olunan vapur listesine yapışdırılmış olan pullar meyânında kāime zamanında ikmâl-i küsûrât için tab‘ edilip el-yevm gayr-ı müsta‘mel olan on paralık pullardan iki aded yapışdırılmış olduğu görülerek îcâb eden cezâ-yı nakdînin sahibinden tahsîli derdest ise de bu makūle gayr-ı müsta‘mel pulların evrâk-ı sâireye de yapışdırılması melhûz olduğundan bunlara devâir ve mehâkim ve mecâlis me’mûrîni taraflarından dikkatle, şâyed öyle eski pul yapışdırılı evrâk görüldüğü takdîrce yolsuz addiyle iktizâ eden cezâ-yı nakdîlerinin tahsîli lüzûmu Düyûn-ı Umûmiye-i Osmâniye Vâridât-ı Mahsûsası İdâresi’nden bâ-tezekkür ve iş‘âr olunmuş ve bu sûret muvâfık-ı nefsü’l-emr görünmüş olmasıyla öyle gayr-ı müsta‘mel pulların resm-i damgaya tâbi‘ olan evrâk ve senedâta yapışdırılmamasına ve yapışdırıldığı görüldüğü hâlde nizâmı dâiresinde îcâb eden rüsûmât ve cezâ-yı nakdîsinin tahsîline be-gāyet i‘tinâ olunması husûsunun ta‘mîmen izbârı Vâridât İdâre-i Umûmiyesi’nden ifâde ve devâir-i sâireye teblîğ-i madde kılınmış olmağın Bâb-ı Vâlâ-yı Fetvâ-penâhîlerince de îfâ-yı muktezâsının lâzım gelenlere emr ü tenbîh buyurulması bâbında emr ü fermân hazret-i veliyyü’l-emrindir. Fî 29 Cumâdelûlâ sene [1]301 ve fî 15 Mart sene [1]301.