İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 223 Hüküm no: 228 Orijinal metin no: [61-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Henüz hakimleri vazifelendirilmeyen yerlerdeki nikah izinlerinden yalnız bir guruş varaka harcı alınıp gerisinin şer‘î hakimlere bırakılması usulüne devam edilmesi Bâb-ı Fetvâ Dâire-i Meşîhat-i İslâmiye İstanbul Kādılığı’na Dersa‘âdet ve bilâd-ı selâse ile ba‘zı vilâyâtda münâkehât için cânib-i şer‘-i şerîfden verilen izinnâmelerden Resm-i Damga Kānûnu mûcebince onar guruş taleb olunmakda idiği tezkire-i senâverîden müstefâd olarak ol bâbda Şûrâ-yı Devlet Tanzîmât Dâiresi’nden kaleme alınan mazbatanın bir fıkrasında beyân olunduğu üzere fi’l-hakīka kānûn-ı mezkûrda izinnâmelerden onar guruş ahzı muharrer ise de hükkâmı tavzîf edilmeyen mahallerde sarf edilecek izinnâmeler için yalnız bir guruş harc-ı varaka ahzıyla kusûru mehâkim-i şer‘iyeye bırakılmış ve buna mefsûh rüsûm-ı sitte ile Düyûn-ı Umûmiye İdâresi’nce de bu âna kadar muvâfakat edilerek te‘âmül hükmüne girmiş olmasına ve esbâb-ı sâireye binâen te‘âmül-i mezkûrun devamına [62] ilişilmemesi ve silâh altında vefât eden efrâd-ı askeriye veresesinin sübût-ı verâsetlerini hâvî i‘lâmât-ı şer‘iyenin âdî varakaya tahrîri hakkında verilen karâr-ı sâbıkın muhâfazası lüzûmu müsellem idiği beyân-ı âlîsiyle hazînece de ber-mûceb-i karâr mu‘âmelât-ı mukteziyenin îfâsı şeref-vârid olan fî 26 Şubat sene [12]99 târihli ve bin yüz seksen bir numaralı tezkire-i sâmiye-i cenâb-ı vekâlet-penâhîde beyân ve i‘şâr buyurulmuş ve ber-mantûk-ı irâde-i aliyye îfâ-yı muktezâsı Düyûn-ı Umûmiye Meclis-i İdâresi Komiserliği’ne ve bi’l-cümle vilâyât ve müstakil mutasarrıflıklara ta‘mîmen teblîğ edilmiş olduğu ifâdesiyle ol vechile ircâ-yı iktizâsının îcâb edenlere tavsiyesi Mâliye Nezâret-i celîlesinden bâ-tezkire izbâr olunarak Dersa‘âdet ve bilâd-ı selâse hükkâmıyla merâkiz-i vilâyât ve elviye-i müstakille nüvvâbına iş‘âr-ı keyfiyet kılınmış olmağla ber-mantûk-ı irâde-i aliyye îfâ-yı mu‘âmeleye himmet ve îcâb edenlere teblîğ-ı maslahat buyurulması siyâkında tezkire-i senâverî terkīm kılındı. Fî 4 Şubat sene [1]301 ve fî 17 Mayıs sene [1]300.