İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 225 Hüküm no: 230 Orijinal metin no: [63-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Resmî ve vakıf binalarının inşaat ve tamiratından önce görevlilerce keşif defteri tanzim edilerek mühürlenmesi Bâbıâlî Dâire-i Sadâret-i uzmâ Taraf-ı âlî-yi Meşîhat-penâhîye Ma‘rûz-ı bende-i dîrîneleridir ki, Ebniye-i emîriye ve vakfiye inşâât ve ta‘mîrât nizâmnâmesinin ikinci maddesinin müceddeden inşâ veyâ ta‘mîr edilecek ebniyenin Dersa‘âdet’de ise Şehremâneti ser-mühendisi ve emânet hendesehânesinden iki me’mûr-ı mücerreb ve mü’temen dört ebniye kalfası ve nâfi‘a mühendisi ve ebniyenin cesâmet ve ehemmiyetine göre Erkân-ı Harbiye zâbıtânından biri ma‘rifetiyle keşfolunarak kullanılacak levâzımın cins ve nev‘i ve ücürât-ı yevmiyenin mikdârını hâvî bir keşf-i evvel defteri tanzîm ile keşfinde bulunanlar tarafından temhîr veyâ imzâ olunacağı muharrer bulunduğu hâlde ba‘zı devâirlerce bu usûle ri‘âyet olunmayıp lüzûm görülen inşâât ve ta‘mîrâtın dâireleri ma‘rifetiyle doğrudan doğruya icrâsına teşebbüs olunmak istenildiğinden ve bu sûret bâ-irâde-i seniyye mevzû‘ ve müesses olan nizâmnâme ahkâmını ihlâl edeceğinden ba‘de ezîn devâir-i idâreye müte‘allik o misillü ta‘mîrât ve inşââtda nizâmnâme-i mezkûr ahkâmına tevfîk mu‘âmele olunması lâzım geleceğinin bi’l-cümle devâire bildirilmesi Şûrâ-yı Devlet Dâhiliye Dâiresi’nden bâ-mazbata ifâde olunmuş ve mûcebince ta‘mîmen devâire teblîğ-i karâr kılınmış olmağla Bâb-ı Vâlâ-yı Fetvâ-penâhîlerince dahi ber-mûceb-i karâr îfâ-yı mu‘âmele-i lâzımeye himem-i aliyye-i Meşîhat-penâhîleri derkâr buyurulmak bâbında emr ü irâde hazret-i men-lehu’l-emrindir. Fî 16 Cemâziyelâhire sene [1]309 ve fî 31 Mart sene [1]300.