İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 227 Hüküm no: 232 Orijinal metin no: [64-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yeni ölçü ve tartıların halk arasında yaygınlaştırılması için devlet dairelerinin bu konuda öncü olması Sadâret’den Taraf-ı âlî-yi hazret-i Fetvâ-penâhîye Ma‘rûz-ı bende-i dîrîneleridir ki, Nân-ı azîz ile mîrî kantarları ve hatab çekileri evzân-ı cedîdeye tahvîl olunup bir yandan dahi ahâlînin evzân-ı mezkûreye alışdırılmalarına çalışılmakda olduğu hâlde ba‘zı devâirce erzâk vesâire mübâya‘atının evzân-ı atîka üzerine mevki‘-i münâkasaya konulup eski okka ta‘bîriyle gazetelerle neşr ü i‘lânı evzân-ı cedîdenin ta‘mîm-i isti‘mâli hakkındaki mesâ‘înin semeresiz kalmasını intâc edeceği Şehremâneti’nden iş‘âr olunmasına ve evzân-ı cedîdenin ta‘mîm-i isti‘mâli lâzımeden ve karâr-ı vâki‘ iktizâsından bulunmasına mebnî bu bâbda ve devâir-i resmiyeye teblîgāt icrâsı Dâhiliye Nezâret-i celîlesinden bâ-tezkire izbâr kılınmış ve vâkı‘â bu misillü icrâatda ibtidâ devâir-i emîriyece halka numûne-i imtisâl gösterilmesi lüzûmu bedîhî idiğinden devâir mübâya‘âtınca evzân-ı cedîde isti‘mâli bi’l-cümle devâire iş‘âr olunmuş olmağla Bâb-ı Vâlâ-yı Fetvâ-penâhîlerince dahi ona göre îfâ-yı mu‘âmeleye himem-i aliyye-i Fetvâ-penâhîleri şâyân buyurulmak bâbında emr ü irâde hazret-i men-lehu’l-emrindir. Fî 18 Receb sene [1]301 ve fî 2 Mayıs sene [1]300.