İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 228 Hüküm no: 233 Orijinal metin no: [64-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Devletin halktaki alacakları için sâdır olan hüküm mazbatalarına pul yapıştırılması gerektiği Taraf-ı âlî-yi hazret-i Meşîhat-penâhîye Ma‘rûz-ı bende-i dîrîneleridir ki, Devletin eşhâs zimmetinde olan alacağına dâir sâdır olacak hüküm mazbatalarından pul resmi istifâsı îcâb edip etmeyeceği ve me’mûrîn muhâkemâtında müdde‘î-i şahsî vesâireye teblîğ ve i‘tâsı iktizâ eden evrâka vaz‘ edilecek pul masrafının ne tarafdan tesviyesi lâzım geleceği ba‘zı dâire ve vilâyâtdan istifsâr olunmasına mebnî ol bâbda cereyân eden müzâkerâtı mutazammın Şûrâ-yı Devlet Tanzîmât Dâiresi’nden kaleme alınan mazbatada vekâlet ve bir meblağ-ı mu‘ayyeni hâvî olmayan kefâlet-i seniyyelerinin on guruşluk varaka-i maktû‘aya tahrîri Resm-i Damga Nizâmnâmesi ahkâmından olarak devâir-i resmiyece dahi zikrolunan kefâlet senedleriyle vekâletnâmelere Resm-i Damga Nizâmnâmesi mûcebince pul yapıştırılması lâzım geleceği mukaddemâ bâ-mazbata beyân edilmesi ve damga kānûn-ı cedîdinin birinci maddesinde mecâlis ve mehâkimden hükmü hâvî verilen mazâbıt ve i‘lâmâtın damga resmine tâbi‘ olacağı muharrer olup bu hükümden devâir-i resmiyenin istisnâsını mûcib bir kaydolmamasına ve müstesnâyı musarrah olmayan kavânîn ve nizâmât ahkâmı umûmî olacağına nazaran o misillü hüküm mazbatalarına dahi pul yapışdırılmak tabî‘î bulunmuş olduğundan gerek bu bâbda ve gerek me’mûrîn muhâkemâtında müdde‘î-i şahs vesâireye teblîğ ve i‘tâsı iktizâ eden evrâka vaz‘ olunacak pul mesârifinin emr-i tesviyesinde devâir-i resmiyenin efrâd gibi hükm-i kānûna tevfîk hareket etmesi lâzım geleceğinin ta‘mîmi devâir ve vilâyâta teblîğ-i karâr olunması da Dâhiliye Nezâret-i celîlesine bildirilmiş ve mukaddemâ i‘tâ olunduğu beyân olunan mezkûr mazbata üzerine fî 22 S sene [1]300 târihinde umûm devâire icrâ-yı teblîgāt olunduğu sırada taraf-ı vâlâ-yı Fetvâ-penâhîlerine dahi iş‘âr-ı keyfiyet edildiği anlaşılmış olmağla Bâb-ı Vâlâ-yı Fetvâ-penâhîlerince de ber-mûceb-i karâr îfâ-yı mu‘âmeleye himem-i aliyye-i Fetvâ-penâhîleri şâyân buyurulmak bâbında emr ü irâde hazret-i men-lehu’l-emrindir. Fî 18 Receb sene 1301 ve fî 2 Mayıs sene 1300. Said