İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 229 Hüküm no: 235 Orijinal metin no: [65-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Memurların muhakemesinde vekil tayininin ne suretle olacağı Şûrâ-yı Devlet’den Huzûr-ı sâmî-yi cenâb-ı Fetvâ-penâhîye Ma‘rûz-ı bende-i dîrîneleridir ki, Mûceb-i muhâkeme-i ahvâlde bulunan me’mûrîn Dersa‘âdet’de mensûb oldukları nezâret veyâ idâre cânibinden tahkīkāt-ı evveliyeleri icrâ kılındıkdan sonra usûlüne tevfîkan muhâkeme edilmekde ve vilâyet meclis-i idâresinde bidâyeten veyâ istînafen muhâkemeleri icrâ kılınıp Şûrâ-yı Devletçe da‘vâları istînafen veyâ temyîzen rü’yet ve tedkīk olunan me’mûrlar hakkında verilen karârlardan ekseriyâ vilâyetlerden mensûb oldukları nezâretlere iş‘âr olunmakda bulunduğu hâlde dâirelerce taleb vukū‘una intizâren vekîl gönderilmemekde olmasına ve nezâret veyâ idâreler cânibinden ikāme olunmuş bir da‘vâ için bâ-tezkire vekîl taleb etmek mehâkimin bî-taraflığına muvâfık olamayacağına binâen bu makūle me’mûrîn haklarında mensûb oldukları nezâret veyâ idârece ma‘lûmât hâsıl olduğu hâlde idâreye mahsûs da‘vâ vekîli var ise bi’z-zât onun veyâ müceddeden ta‘yîn kılınacak vekîlin Şûrâ-yı Devlet’e mürâca‘atla işi aramasının lâzım gelenlere tenbîhiyle beraber vekîllerin dahi evrâk-ı <> da‘vâyı kable’l-muhâkeme mütâla‘a ve îcâb edenler ile mensûb oldukları nezâret veyâ idâre ma‘rifetiyle muhâbere ederek esnâ-yı muhâkemede îrâd olunacak es’ileye etrâfıyla cevâb i‘tâ edebilmeleri esbâbının tenbîh ve ihtârıyla muhâkemenin rü’yetine ibtidâr olundukdan sonra tahkīkāt icrâ etmek üzere te’hîre vesîle olmamalarının dahi vekîllere bildirilmesi lüzûmu Şûrâ-yı Devlet Muhâkemât Dâiresinden bâ-müzekkire ifâde olunmuş ve mûcebince teblîgāt-ı lâzıme îfâ kılınmış olmağla dâire-i celîle-i Fetvâ-penâhîlerince dahi iktizâ-yı hâlin icrâsı bâbında emr ü fermân hazret-i men-lehu’l-emrindir. Fî 6 Şevval sene [1]301 ve fî 17 Temmuz sene [1]300. Akif [66. sayfa boştur]