İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 230 Hüküm no: 236 Orijinal metin no: [67-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstinaf ve iade-i muhakeme davalarında yeniden verilecek ilâm harçları Meşîhat’den İstanbul Kādılığı’na Fazîletlü efendim hazretleri, İstînaf ve i‘âde-i muhâkeme üzerine hükm-i ibtidâînin tasdîk veyâ nakzına dâir verilecek i‘lâmât-ı şer‘iyeden harc alınıp alınmayacağı ve taşra mehâkimi İstanbul Bâb ve Kısmet ve Teftîş Mahkemeleri vezâifini hâiz olmalarıyla mevâdd-ı câriyeden Mahkeme-i Teftîş vezâifine ta‘alluk eden cihat için alınacak harçların mahkeme-i mezkûre harç ta‘lîmâtına tevfîk edilmesi lâzım gelip gelmeyeceği Edirne vilâyeti merkez niyâbetinden istifsâr olunmasına mebnî ol bâbda ib‘âs kılınan tezkire-i senâverî üzerine cereyân eden müzâkereyi mutazammın Şûrâ-yı Devlet Tanzîmât Dâiresi’nden i‘tâ olunan mazbatadan müstebân olduğu vechile bidâyeten bir mahkemede rü’yet edilen madde gerek o mahkemede ve gerek diğer bir mahkemede istînaf edilsin ve hükm-i ahîr hükm-i evvelin tasdîki veyâ nakzını mutazammın bulunsun şer‘de istînaf nâmına bakılan ikinci da‘vâ evvelki da‘vâyı i‘âdeten rü’yet demek olacağına nazaran i‘lâm-ı sânî için harc alınmak muvâfık-ı ma‘delet olmayıp yalnız ikinci i‘lâmda fazla bir şey hükmolunur ise fazlanın derecesine göre i‘âde-i muhâkeme i‘lâmlarından maktû‘ vechile alınan harcın en dûn mertebesinden noksan olmamak üzere nisbî harc alınmak muvâfık <> ve Fetvâhâne’den harc edilen i‘lâmâtın mahâlline i‘âdesiyle ikinci derecede istihsâl olunan i‘lâmât hakkında dahi çünki mehâkim-i şer‘iye ta‘lîmâtının elli yedinci maddesi hükmünce bu misillü mecrûh i‘lâmların harcı reddolunmak lâzım geleceğine mebnî bu vechile mu‘âmele olunmak ve mehâkim-i hukūkıyeden verilen i‘âde-i mehâkim i‘lâmlarının dahi husûsunda ne yolda mu‘âmele olunur ise bunda dahi istînaf i‘lamlarında muharrer kā‘ideye imtisâl edilmek lâzım geleceğinin ve mahkeme-i teftîşe mahsûs olmak üzere neşrolunan harc ta‘lîmâtı ahkâmına taşra mehâkiminin ittibâ‘ edip etmeyeceği bahsine gelince, bir dâireye mahsûs olan ta‘lîmâtın yine o ta‘lîmâtda umûmiyeti tasrîh kılınmadıkça ta‘mîm hükmüne mesâğ olmayacağının niyâbet-i mezkûreye iş‘ârı tezekkür olunmuş olmasıyla îfâ-yı muktezâsı taraf-ı sâmî-i Sadâret-penâhîden izbâr buyurulmuş ve keyfiyet Meclis-i Tedkīkāt-ı Şer‘iyyece dahi mütâla‘a ve tasvîb olunarak sûret-i iş‘âr-ı sâmînin Dersa‘âdet ahkâm-ı kirâmıyla merâkiz-i vilâyât ve elviye-i müstakille nüvvâbına ta‘mîmen teblîğ ve izbârı lüzûmu ifâde olunması üzerine ol vechile îcâbı icrâ kılınmış olmağın sûy-ı fâzılânelerinden dahi ber-minvâl îfâ-yı mu‘âmeleye himmet ve mülhakāt nüvvâbına da teblîğ-i keyfiyet buyurulması siyâkında tezkire-i senâverî terkīm kılındı. Fî 24 Muharrem sene [1]302 ve fî 1 Teşrîn-i sânî sene [1]300. Ahmed Esad