İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 234 Hüküm no: 238 Orijinal metin no: [69-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yeni ağırlık ve ölçü birimlerinin kullanımının yaygınlaşması için gerekenin yapılması Sadâret’den Taraf-ı sâmî-yi hazret-i Meşîhat-penâhîye Ma‘rûz-ı bende-i dîrîneleridir ki, Evzân ve ekyâl ve makāyis-i cedîdenin ta‘mîm ve isti‘mâli mukarrer olduğu hâlde eyâdî-i nâsda bunların atîki kullanılmakda idiğinden halkın alışdırılmasına bir derece daha medâr olmak üzere bi’l-cümle devâir-i emîriyece kâffe-i mu‘âmelâtda evzân ve ekyâl ve makāyis-i cedîdenin isti‘mâline i‘tinâ olunmağla beraber gazetelerle dahi i‘lân olunduğu vechile evzân ve ekyâl ve makāyisi hâvî olarak verilecek istid‘âların eski vezin ve keyl ve arşınların cedîde tahvîliyle beyân ve tasrîh ettirildikden sonra kabûl olunması veyâhûd istenmediği hâlde eskilerin yanına yenilerin dahi yazılması ve verilecek emlâk ve arzazî senedâtında ve ruhsatnâme ve mukāvelenâmelerde ve i‘lâmât ve hücec-i şer‘iyede ve bunlara mümâsil evrâk-ı resmiyece kezâlik bu kā‘ideye ri‘âyet edilmesi Dâhiliye Nezâret-i celîlesinden vukū‘ bulan iş‘âr üzerine ta‘mîmen ve devâire bildirilmiş ve vilâyât ile idâre-i müstakillede bulunan mutasarrıflıklara dahi teblîgāt îfâsı nezâret-i müşârün-ileyhâya iş‘âr kılınmış olmağla Bâb-ı Vâlâ-yı cenâb-ı Fetvâ-penâhîlerince ber-vech-i muharrer îfâ-yı mu‘âmele olunmasının lâzım gelenlere emr ü tenbîhine himem-i aliyye-i Meşîhat-penâhîleri şâyân buyurulmak bâbında emr ü irâde hazret-i men-lehu’l-emrindir. Fî 24 Muharrem sene [1]302 ve fî 1 Teşrîn-i sânî sene [1]300. Said