İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 235 Hüküm no: 239 Orijinal metin no: [70-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İcareteyn ile tasarruf edilen malların mütevellinin izni ile başkasına ferağ edilip edilemeyeceği Fî 27 L sene [12]97 târih ve 90 numaralı bi’l-cümle vilâyât merâkiz ve müstakil idâre olunan mutasarrıflıklar nüvvâbıyla Şehremât-i celîlesi idâresinde bulunan elviye niyâbet-i şer‘iyelerine yazılan tahrîrât-ı aliyye-i umûmiye Dersa‘âdet’in ekser mahallerinde ve memâlik-i şâhânenin ba‘zı yerlerinde icâreteyn sûretiyle tasarruf olunmakda bulunan akārât-ı mevkūfenin izn-i mütevellî ile âhara ferâğında işbu ferâğın inde’l-fukahâ nüzûl veyâ îcâr kabîlinden olması ve hukūk-ı mücerrededen i‘tiyâzın cevâz ve adem-i cevâzı hakkında kavleyn olup meşâyih-i İslâmiye’nin ba‘zıları ferâğın nüzûl idiği ve bunda i‘tiyâzın adem-i cevâzı tarafını ilzâm ederek bedel-i ferâğın şer‘an adem-i lüzûmuyla iftâ eyledikleri gibi ba‘zıları dahi îcâr veyâhûd hukūk-ı mücerrededen i‘tiyâzın cevâzı cihetini ihtiyâr ederek bedel-i ferâğın lüzûmu ve şurût-ı müfside ve tağrîr ve gabn misillü da‘vâların istimâ‘ı zımnında verilen fetâvâyı imzâ etmeleriyle o makūle vukū‘âtda hükkâm-ı şer‘-i şerîfin dûçâr oldukları müşkilâtın def‘i’çün husûs-ı mezkûr hakkında olan mesâil ve fetâvâ tedkīk ve mu‘âmelât-ı câriye tahkīk olundukda hukūk-ı mücerrededen i‘tiyâzın cevâzı tarafını iltizâm ile iftâ eyleyen meşâyih-i İslâmiye fetâvâsının fî-zamâninâ mu‘âmele-i nâsa erfakıyeti ve evfakıyeti anlaşılmış ve icâreteyn ile tasarruf olunan akārâtın icrâ-yı ferâğ ve teferruğu âdetâ alım-satım hükmüne girmesiyle kavl-i ahîr ile amel müraccah bulunmuş olduğundan ba‘de ezîn mukābele-i ferâğ ve tefvîze de tesmiye kılınan bedel da‘vâlarının istimâ‘ı hakkında sahib-i fetvâ Abdurrahim Efendi’nin vermiş oldukları fetvâ-yı şerîfe ile istihsânen iftâ ve Arâzî Kānûnu fasl-ı sânînin otuz sekizinci maddesi dahi buna göre ta‘dîl ve tebdîl edilmesi ez-her-cihet evlâ ve ahrâ olacağı Meclis-i Tedkīkāt-ı Şer‘iyye’den ifâde olunarak madde-i mezkûrenin tashîhine makām-ı celîl-i vekâlet-penâhîden bi’l-istîzân irâde-i seniyye-i cenâb-ı pâdişâhî müte‘allik ve şeref-sünûh buyurulması üzerine îcâbı bi’l-icrâ icâreteyn sûretiyle tasarruf edilen akārât-ı mevkūfenin ferâğ ve tefvîz mukābilinde teşmiye kılınan bedel için fîmâ-ba‘d ya‘ni irâde-i seniyye-i mezkûre târihinden muahhar olarak vukū‘ bulan da‘vâların istimâ‘ı ve ol vechile iftâ olunması Mecelle Cem‘iyet-i aliyyesinin karârına ve ol bâbda fetvâhâneden vukū‘ bulan ifâdeye binâen bi’l-cümle vilâyât merkezleriyle elviye-i müstakille nüvvâb-ı kirâmına ve kādı efendilere tavsiye ve iş‘âr kılınmış olmağla taraf-ı semîhânelerinden dahi o yolda îfâ-yı mu‘âmeleye himmet buyurulması siyâkında. Aslına mutâbıkdır Bâb-ı Fetvâ Müdîr-i Evrâk