İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 236 Hüküm no: 240 Orijinal metin no: [70-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şer‘î makamlardan izinname almadan nikah kıyan imamlara verilecek ceza Makām-ı Meşîhat’den İstanbul Kādılığı’na Fazîletlü efendim hazretleri, Mehâkim-i şer‘iyeden ale’l-usûl izinnâme almaksızın akd-i nikâha cür’et eden eimme hakkında lâzım gelen mu‘âmele Petriç niyâbetinden istifsâr olunması ve izinnâmesiz akd-i nikâh edenler hakkında mu‘âmele-i kānûniyenin icrâsı fî 23 Cemâziyelâhire sene [12]97 târihli tezkire-i sâmiye hükmü iktizâsından ise de bu mu‘âmele Cezâ Kānûnnâmesi’nin kangı maddesine kıyâsen icrâ olunmak lâzım geleceğine dâir sarâhat olmaması cihetiyle burasının Şûrâ-yı Devletçe ta‘yîni zımnında Meclis-i Tedkīkāt-ı Şer‘iyye ifâdesiyle yazılan tezkire-i senâverî üzerine şûrâ-yı mezkûr Tanzîmât Dâiresi’nden i‘tâ olunan mazbatada mezkûr tezkire-i sâmiyede izinnâmesiz nikâh vukū‘unda akdi icrâ eden imâmlar hakkında mu‘âmele-i kānûniye icrâ olunacağı mutlak olarak muharrer ise de bu madde Şûrâ-yı Devletçe tefsîr edilecek mevâddan olmayıp hilâf-ı usûl akd icrâ olunduğu hâlde müdde‘î-i mûmâye ihbâr keyfiyetiyle onun tarafından mahkeme-i müte‘allikası huzûrunda ikāme-i da‘vâ olunmak ve bunun kangı madde-i kānûniyeye tatbîk ve kıyâs olunacağı dahi mahkemece ta‘yîn edilmek lâzım geleceği gösterilmiş ve Adliye Nezâret-i celîlesine ma‘lûmât verilmiş olduğu beyân-ı âlîsiyle bâb-ı Fetvâca dahi iktizâsının îfâsı cevâben vârid olan tezkire-i sâmiye-i Sadâret-penâhîde izbâr buyurulmakdan nâşî keyfiyetin Dersa‘âdet hükkâm-ı kirâmıyla merâkiz-i vilâyât ve elviye-i müstakille nüvvâb-ı şer‘iyesine ta‘mîmen teblîğ ve iş‘ârı meclis-i mezkûrdan iş‘âr olunarak îcâbı icrâ edilmiş olmağla ol vechile îfâ-yı mu‘âmeleye himmet ve sûret-i iş‘âr-ı sânînin mehâkim-i mülhakaya da izbârına mübâderet buyurulması siyâkında tezkire-i hulûsverî terkīm olundu. Fî 17 Rebî‘ülâhir sene [1]302 ve fî 22 Kânûn-ı sânî sene [1]300. Ahmed Esad